अतिथी कट्टा

दिनांक : २०-०७-२०१९

‌‌‌‌‌‌‌‌‌विक्रमनं ‘स्माइल प्लीज’ चित्रपट ‘दिल से’ बनवलाय




विक्रम फडणीस दिग्दर्शित ‘स्माइल प्लीज’ हा चित्रपट नुकताच प्रदर्शित झालाय. या चित्रपटाचं संगीत सुपरस्टार शाहरुख खानच्या हस्ते प्रकाशित करण्यात आलं. त्यानिमित्तानं शाहरुखचं हे मनोगत

——

‘स्माइल प्लीज’च्या म्युझिक लॉंचला येण्यापूर्वी मी माझी पत्नी गौरीला सांगत होतो की विक्रम फडणवीसवर माझं एवढं प्रेम का आहे हे मलाही माहीत नाही. खरं तर त्याच्याबरोबर जास्त वेळही देता येत नाही. गेल्या २० वर्षांपासून आम्ही एकमेकांना ओळखतोय. सलमान आणि मी त्याचे खास मित्र आहोत. गेल्या दोन दशकांमध्ये फॅशन डिझायनर म्हणून विक्रमनं खूप मोठं नाव कमावलं आहे. जो कोणी फिल्ममेकर, दिग्दर्शक बनतो, तो माझा प्रिय होऊन जातो. त्यानं दोन वर्षांपूर्वी ‘हृदयांतर’ बनवली तेव्हा मला खूपच आनंद झाला होता. मी त्याच्या चित्रपटाच्या मुहूर्ताला हजर राहू शकलो नव्हतो. परंतु आज मी येथे उपस्थित आहे. त्यानं स्वतःमध्ये नि स्वतःच्या चित्रपटामध्ये जी कल्पकता ओतली आहे, ती निश्चितच कौतुकास्पद आहे. त्यामुळे भविष्यात त्याच्याकडून आणखी काही खास फिल्म्स पाहायला मिळतील याची मला खात्री आहे.

विक्रमने या चित्रपटासाठी खूप चांगली टीम निवडली आहे. मुक्ता बर्वे, ललित प्रभाकर, प्रसाद ओक हे खूप चांगले कलावंत आहेत. एकाच चित्रपटामध्ये एवढे चांगले कलाकार एकत्र येणं ही खूप महत्त्वाची गोष्ट आहे. रोहन आणि रोहन या दोघांनी या चित्रपटाला चांगलं संगीत दिलं आहे. एकाच नावाचे दोन दिग्दर्शक चित्रपटसृष्टीत आहेत, ही चांगली गोष्ट आहे. आपल्यातील प्रत्येकामध्ये एक व्यक्तिचित्रणात्मक लेखक, दिग्दर्शक, निर्माता असतो. त्यामुळे आपल्या आयुष्याचा काही भाग काही स्पेशल चित्रपटांमध्ये प्रतिबिंबीत होत असतो.पत्रकार परिषदेला सुरुवात करण्यापूर्वी मी विक्रमला विचारलं होतं की तू चांगली फिल्म बनवली आहेस की नाही? खरं तर हा प्रश्न मलाही कोणीही नवीन चित्रपटापूर्वी विचारू शकतो. विक्रमचे हे दोन्ही चित्रपट थोडेसे गंभीर वळणाचे आहेत. म्हणून मी त्याला असंच आपलं अक्शन कॉमेडी चित्रपट करण्यास सांगितलं आहे. तेव्हा त्यानं माझ्या म्हणण्याला होकार न देता आपण जो काही चित्रपट बनवलाय तो ‘दिल से’ असल्याचं सांगितलं. मला त्याचं हे उत्तर खूप आवडलं.

विक्रमकडून मी या चित्रपटाची कथा जाणून घेतलीय. ती खूप छान आहे. काहीतरी वेगळं सांगण्याचा प्रयत्न विक्रमनं या चित्रपटामधून केला आहे. प्रेम, नातेसंबंध, परस्परांना दिलेली साथ याचं अनोखं मिश्रण या चित्रपटाद्वारे प्रेक्षकांना पाहायला मिळणार आहे. आपल्या आयुष्यातील चढ-उतारांचे दर्शन आपल्याला या चित्रपटामधून दिसेल. कितीही संकटं येऊ देत माझ्या मते कोणताही फिल्ममेकर जेव्हा ‘दिल से’ चित्रपट बनवतो तेव्हा त्याच्यापेक्षा दुसरी सरस कलाकृती असू शकत नाही. त्यामुळेच हा चित्रपट अधिकाधिक प्रेक्षकांपर्यंत पोचावा, अशीच मी इच्छा व्यक्त करतो.

– शाहरुख खान

ठेवणीतले लेख

    आपल्या प्रतिक्रिया येथे नोंदवा



    [recaptcha]

    काही निवडक प्रतिक्रिया:

    नरेंद्र चौधरी


    आपल्या संकेतस्थाळाच्या माध्यमातून असे लक्षात आले कि आपन खूप छान माहिती पुरवत आहात.
    संदर्भ:- ई-मेल प्रतिक्रिया