अतिथी कट्टा

——–

कोणतीही चांगली कलाकृती बनण्यासाठी वेळ हा लागतोच. या चित्रपटाची कथा, पटकथा, गीत-संगीतासाठी आम्हाला बराच वेळ द्यावा लागला. मुळात चांगली गाणी बनण्यासाठी वेळ द्यावा लागतो. तो आम्ही या चित्रपटासाठी दिला. या चित्रपटाचं कथानक सुचलं ते आमचे दिग्दर्शक गजानन पडोळ यांना. त्याच्याबरोबर माझी आधीपासूनची ओळख होती. गजानन माझ्याकडे एकूण दोन गोष्टी घेऊन आला होता. त्यातली पहिली गोष्ट मला आवडली नव्हती. त्यानंतर आणखी दोन महिने गेले आणि तो दुसरी नवीन गोष्ट माझ्याकडे घेऊन आला. पण तीदेखील गोष्ट माझ्या पसंतीस उतरली नाही. तेव्हा मी त्याला काहीतरी आणखी वेगळा प्रयत्न करण्यास सांगितलं. माझ्या या बोलण्यानं गजानन नर्व्हस होणं साहजिक होतं. त्याला वाटलं की या पिक्चरवाल्यांचं काही खरं नाही. तेव्हा मीच एके दिवशी त्याला फोन केला आणि त्याला त्याच्या नवीन गोष्टीबद्दल विचारलं. यावेळी त्याला माझा सीरियनेस जाणवला. त्यानंतर मग तो माझ्याकडे ‘रौंदळ’ची गोष्ट घेऊन आला.

सर्वसामान्य शेतकऱ्यांच्या मुलांची ही गोष्ट आहे. माती आणि मातीशी निगडीत असलेल्या शेती तसेच नात्यांबद्दल हा चित्रपट बोलतो. पिकवणं आपल्या हातात आहे, पण बाजारभावाच्या गोष्टी आपल्या हातात नसतात. त्यामुळे मग रौंदळसारखा प्रकार घडतो. जुन्नर, मंचर, श्रीगोंदा, बारामती आदी ठिकाणी हा चित्रपट आम्ही शूट केलाय. जवळपास 52 ते 55 दिवस आम्ही त्याचं शूटिंग केलंय. माझे आधीचे दोन चित्रपट मी भाऊराव कऱ्हाडेंसमवेत केले होते.