अतिथी कट्टा

——

या चित्रपटाच्या शूटिंगची तयारी सुरू असताना माझी मैत्रीण नीता दोंदेचा मला फोन आला. तिनं या चित्रपटामध्ये अंशुमन विचारेंच्या पत्नीची भूमिका केली आहे. या चित्रपटाचं बरंचसं कास्टिंग अजून बाकी होतं. त्यामुळे चित्रपटाचे दिग्दर्शक दयासागर वानखेडे यांच्याशी संवाद साधल्यानंतर त्यांनी या चित्रपटात काही आव्हानात्मक भूमिका असल्याचं सांगितलं. त्या साकारण्यासाठी कोणी ओळखीच्या चांगल्या अभिनेत्री आहेत का, असं त्यांनी मला विचारलं. या भूमिकांना संवाद कमी असले तरी भावनांमधून बरंच काही दाखवण्यासाठी संधी होती. नीताबरोबर मी यापूर्वी ‘अंगाई’ नावाचा चित्रपट केला होता. त्यामुळे तिनंच माझं नाव या चित्रपटासाठी सुचवलं. त्यानुसार मी वानखेडे यांना जाऊन भेटले. विशेष म्हणजे त्यांनी मला या चित्रपटात तीन आव्हानात्मक भूमिका असून त्यातली एका भूमिकेची निवड तू स्वतःच कर असं सांगितलं. याअगोदर मी ‘ज्योती सावित्री’ नावाचं एक नाटक केलं होतं. या नाटकाची वानखेडे यांना कल्पना होती. म्हणूनच त्यांनी मला भूमिकेची निवड करण्याचं स्वातंत्र्य दिलं होतं. त्यानुसार मी स्क्रीप्ट वाचली नि प्रकाशच्या आईची भूमिका स्वीकारली.

ही भूमिका खूप आव्हानात्मक आहे. मुळात ग्रामीण भागातल्या शिक्षणव्यवस्थेवर भाष्य करणारा हा चित्रपट आहे. आपल्या मुलांनी शिकलं पाहिजे, असा ध्यास इथल्या आई-वडिलांचा असतो. त्यांची ही तळमळ-धडपड दाखवणारी माझी ही भूमिका आहे. मी एकटीनंच प्रकाश या माझ्या मुलाला वाढवलेलं असतं. मुलानं मोठं व्हावं म्हणून ती अहोरात्र कष्ट करीत असते. मी एका वीटभट्टी कामगाराची भूमिका साकारली आहे. या भूमिकेला खरेपण येण्यासाठी मी १२-१२ तास काम केलं. एक गोष्ट तर अशी घडली की शूटिंगच्या आधी माझ्या भूमिकेचा लुक आम्हाला नीट सापडत नव्हता. वीट कामगाराच्या भूमिकेसाठी आवश्यक असलेला स्कीन टोन मॅच होत नव्हता. त्यावेळी मग घमेलीभरून माती माझ्या डोक्यावरून ओतण्यात आली. अनेक तास उन्हात बसल्यानंतर मग कुठे स्कीन टोन मॅच झाला.