अतिथी कट्टा

——

‘बंदिशाळा’मध्ये मी एका जेलरचा रोल केला आहे. सत्यघटनेवर आधारलेला हा चित्रपट आहे. कर्तव्यदक्ष आणि शिस्तप्रिय अशी ही जेलर आहे. जिचा जेलमध्ये वचक असतो. सगळे जण तिला घाबरून असतात. कारण ती कधीही तिच्या कामात चुकत नसते. त्यामुळे अन्यायाविरूद्ध आवाज उठविणाऱ्या या माधवी सावंतची भूमिका साकारताना मला खूप छान वाटलं. ही वर्दी कमवायला खऱ्या आयुष्यात खूप मेहनत करावी लागते. त्यामुळे अशा पोलीस अधिकाऱ्याची भूमिका निभावताना मला खूप अभिमान वाटला. मी स्वतःला खूप लकी मानते. मी वेगवेगळ्या पॉइंट ऑफ व्ह्यूने अनेक जणींच्या आयुष्याकडे बघू शकते. पण आतापर्यंत जगलेल्या भूमिकांपेक्षा मी खूप वेगळी भूमिका घेऊन तुमच्यापुढे आलेय.

या चित्रपटाची गोष्ट ऐकल्यानंतर संजय पाटीलसर आणि विजय लेले सरांनी माझी बऱ्याच पोलीस अधिकाऱ्यांबरोबर गाठ घालून दिली. मी या चित्रपटात महिला पोलीस अधिकाऱ्याची भूमिका साकारली असली तरी सगळ्याच महिला पोलीस अधिकाऱ्यांना भेटले नाही. पोलीस दलातील प्रोटोकॉल्स समजून घेण्यासाठी मला पुरुष पोलीस अधिकाऱ्यांनाही भेटणं गरजेचं होतं. सिनेमातला निम्म्याहून अधिक भाग हा जेलमध्ये घडतो. त्यामुळे चित्रीकरणावेळी आम्ही फारशा चुका करत नाही ना, हे पाहण्यासाठी पोलीस अधिकारी सेटवर यायचे. पोलिसांची मेडल्स नीट लावली आहेत ना, पोलीस अधिकाऱ्यांच्या टेबलवरील भारताचा झेंडा नीट लावलाय ना याची आम्ही काळजी घ्यायचो. कारण कोणत्याही सिस्टीमचा आपल्याकडून अवमान होऊ नये, असं मला वाटत होतं.