जैतर. . .खान्देशात घडलेल्या सत्यघटनेवर आधारित प्रेमकहाणी

हितचिंतक नसलेला तो ‘जैतर’. अर्थात, हा शब्द उत्तर महाराष्ट्रात खान्देश प्रांतातील बोलीभाषेत प्रचलित आहे. ‘जैतर’ ही एका विद्यार्थीदशेतील प्रेमीयुगुलाची, मालेगावात घडलेल्या एका सत्यघटनेवर आधारित गोष्ट आहे. जाती, वर्ण, आर्थिकस्तर आदी गोष्टींवरून समाजात भेदाभेद होतो. त्याचे पडसाद अनेकदा प्रेमप्रकरणात किंवा लग्नादरम्यान उमटतात आणि प्रेमीयुगुलाला संघर्षाला तोंड द्यावे लागते. ग्रामीण भागात ह्या संघर्षाचे गंभीर परिणाम अनेक अंगाने मुलीला भोगावे लागतात. प्रामुख्याने तिच्या शिक्षणावर आणि एकूणच स्वातंत्र्यावर बंदी येते. चित्रपटाचे कथालेखक आणि निर्माते मोहन घोंगडे हे मूळ शेतीव्यावसायिक आहेत. मालेगावात प्रेमप्रकरणावरून घडलेल्या ‘त्या’ सत्यघटनेत त्यांना याहून गंभीर समस्या दिसली आणि त्यांचे संवेदनशील मन व्यथीत झाले. त्या समस्येला वाचा फोडण्यासाठी त्यांनी "जैतर" ही कथा लिहीली आणि त्याला समाजापर्यंत पोहोचविण्यासाठी त्यांनी सिनेमा हे माध्यम निवडले. ह्या चित्रपटाचा संगीत व ट्रेलर प्रकाशन सोहळा फेमस स्टुडियोत ज्येष्ठ पत्रकार नंदकुमार पाटील यांच्या हस्ते झाला. ह्या प्रसंगी सिनेमातील प्रमुख कलावंत रजत गवळी, सायली पाटील, गणेश सरकटे, गीतकार विष्णू थोरे, संगीतकार योगेश खंदारे आणि निर्माता मोहन घोंगडे व इतर तंत्रज्ञ उपस्थित होते. मंगेश कांगणे, विष्णू थोरे आणि योगेश खंदारे यांच्या गीत रचनांवर योगेश खंदारे यांनी संगीतबद्ध केलेली गाणी यात आहेत. आदर्श शिंदे यांच्या आवाजातील ‘देव मल्हारी’ हा गोंधळ ताल धरायला लावणारा तर अवधूत गुप्ते यांनी गायलेले ‘आधाराचं आभाळं’ हे विरहगीत काळजाचा ठाव घेणारे आहे. चित्रपटाची पटकथा-संवाद आणि दिग्दर्शन घन:श्याम पवार यांचे आहे. चित्रीकरण खान्देशात करण्यात आले आहे. चित्रपटात रजत गवळी आणि सायली पाटील हे दोन नवोदित कलाकार प्रमुख भूमिकेत असून गणेश सरकटे, गायत्री सोहम, अविनाश पोळ, रामेश्वर डापसे, अरुण गीते, स्मिता प्रभू, जीवन महीरे तसेच संग्राम साळवी इतर कलाकार आहेत. शिवमल्हार पुजा फिल्म प्रोडक्शन निर्मित, निर्माता मोहन घोंगडे लिखित, घन:श्याम पवार दिग्दर्शित, धीरज वाघ यांच्या कॅमेरातून सजलेला हा चित्रपट १४ एप्रिल रोजी प्रदर्शित होईल.

मराठी रुपेरी पडद्यावर ‘आणीबाणी’

लेखक अरविंद जगताप आणि दिग्दर्शक दिनेश जगताप यांनी विनोदाची ‘आणीबाणी’ प्रेक्षकांसाठी आणली आहे. उपेंद्र लिमये, प्रवीण तरडे, सयाजी शिंदे, संजय खापरे, वीणा जामकर, उषा नाईक, प्राजक्ता हनमघर, सीमा कुलकर्णी, रोहित कोकाटे, सुनील अभ्यंकर, पद्मनाभ बिंड, किशोर नांदलस्कर अशा अनेक दिग्गजांचा या ‘आणीबाणी’त सहभाग आहे. 'दिनिशा फिल्म्स' निर्मित हा चित्रपट जूनमध्ये प्रदर्शित होईल. कृष्णा जगताप, योगेश शिंदे, सचिन जगताप, अमोल महाडिक या चित्रपटाचे सहनिर्माते आहेत. चित्रपटाची कथा,पटकथा,संवाद अरविंद जगताप यांचे आहेत. वलय मुळगुंद आणि प्रसन्न यांनी लिहिलेल्या गीतांना हरिहरन, अवधूत गुप्ते, आदर्श शिंदे, सायली पंकज, गणेश चंदनशिवे यांनी स्वरबद्ध केले आहे. देवदत्त मनीषा बाजी, आदित्य पटाईत,पंकज पडघन यांनी संगीतसाज दिला आहे. पार्श्वसंगीत पंकज पडघन यांचे आहे. वेशभूषा पूर्णिमा ओक तर कलादिग्दर्शन सुधीर सुतार यांचे आहे. साऊंड डिझाईनची जबाबदारी निखिल लांजेकर यांनी सांभाळली आहे. डी.आय,..किरण कोट्टा आणि मिक्स,.. नागेश राव चौधरी यांनी केले आहे. छायांकन मंगेश गाडेकर यांचे असून संकलन प्रमोद कहार यांचे आहे.

अशोक सराफ यांना झी मराठी चित्रगौरव जीवनगौरव पुरस्कार

यंदाचा झी चित्र गौरव पुरस्कार सोहळा हा खूप अविस्मरणीय होणार आहे. कारण अनेक दिग्गज कलाकारांचे धमाकेदार परफॉर्मन्स पाहता येणार आहेत. अजून एक गोष्ट म्हणजे मराठीतली आपली सदाबहार आवडती जोडी ‘सचिन पिळगावकर आणि सुप्रिया पिळगावकर’ बऱ्याच काळानंतर एकत्र धमाकेदार सादरीकरण करणार आहेत.या पुरस्कार सोहळ्याचं आणखी एक वैशिष्ट्य म्हणजे 'जीवनगौरव पुरस्कार’, ह्यावर्षी या जीवनगौरव पुरस्काराचे मानकरी ठरले ते म्हणजे अभिनय सम्राट 'अशोक सराफ'. या महान नटसम्राटाला अभिनेता सिद्धार्थ जाधवने आपल्या नृत्याविष्काराने अशोक मामांचा जीवन प्रवास उलगडत अनोखी मानवंदना दिली. अशोक सराफ यांची चित्रपटसृष्टीतली ओळख म्हणजे ‘अशोक मामा’! खळखळून हसवणारे आणि तेवढेच अंतर्मुख करणारे अशोक मामा. पन्नासच्या वर हिंदी सिनेमे, दोनशेच्या आसपास मराठी सिनेमे, पंधरा टीव्ही मालिका, पंचवीस नाटकं आणि पुरस्काराचं अर्धशतक. एवढा प्रचंड प्रवास आहे मामांचा. जो आजही तेवढ्याच ताकदीने चालू आहे. अभिनय शिकायला कुठल्या शाळेत जायची गरज नाही. अशोक सराफ नावाचं विद्यापीठ आहे केवळ बघत राहिलो तरी खूप काही शिकण्यासारखं आहे.

‘चौक’ लवकरच!

चौक... चौक म्हणलं की आठवतो तो चौकातल्या मंडळींचा गलका, येणाऱ्या-जाणाऱ्यांची वर्दळ, चौकातल्या काका, मामा, दादांचे किस्से, वाद आणि असं बरंच काही... अशाच एका चौकाची गोष्ट आपल्यासमोर घेऊन येत आहेत अभिनेते आणि दिग्दर्शक देवेंद्र गायकवाड उर्फ दया. या चित्रपटाचे पहिले पोस्टर रिलीज झाले. या पोस्टरमध्ये, चौकात सूचना, सुविचार लिहिण्यासाठी असलेला फळा दिसतोय. दोस्ती ग्रुप, पुणे यांच्या या फळ्यावर मोठ्या अक्षरात ‘चौक’ दिसतंय. अनुराधा प्रॉडक्शन आणि निर्माते दिलीप लालासाहेब पाटील (तात्या) प्रस्तुत या चित्रपटाची कथा, पटकथा, संवाद आणि दिग्दर्शन देवेंद्र गायकवाड यांचे असून या चित्रपटाच्या निमित्ताने ते दिग्दर्शनात पदार्पण करत आहेत. यापूर्वी त्यांनी देऊळ बंद, मुळशी पॅटर्न, बबन, रेगे, धर्मवीर, सरसेनापती हंबीरराव, हिंदीतील तान्हाजी या चित्रपटांमध्ये भूमिका साकारली होती.

‘रावरंभा’ १२ मे पासून जवळच्या चित्रपटगृहात प्रदर्शित होत आहे

मराठीत सध्या अतिशय मोठ्याच प्रमाणावर बहुचर्चित, बिग बजेट, भव्य असे ऐतिहासिक चित्रपट पडद्यावर येत आहेत. अशातच आता... श्वास धरा रोखून,तो येतोय उसळत्या घोड्यावर स्वार होवून, अन् पोलादी तलवारीस धार लावून! अशी जबरदस्त टॅगलाईनने 'रावरंभा' १२ मे पासून जवळच्या चित्रपटगृहात प्रदर्शित होत आहे. या चित्रपटाची निर्मिती शशांक पोवार यांची असून दिग्दर्शन अनूप वसंत जगदाळे यांचे आहे.

प्रेमाची परिभाषा सांगणार ‘सरी’

'लाईफ इज फुल्ल ऑफ सरप्राइजेस अँड मिरॅकल्स' याच आशयाच्या 'सरी' या चित्रपटाचे पोस्टर सोशल मीडियावर झळकले असून ५ मे रोजी हा चित्रपट प्रदर्शित होईल. प्रेमाचा त्रिकोण असलेल्या या चित्रपटात अजिंक्य राऊत, रितिका श्रोत्री, पृथ्वी अंबर आणि मृणाल कुलकर्णी प्रमुख भूमिकेत आहेत. कॅनरस प्रॉडक्शन्स प्रस्तुत, डॉ. सुरेश नागपाल, आकाश नागपाल निर्मित या चित्रपटाचे लेखन, संकलन आणि दिग्दर्शन अशोका के. एस. यांचे असून दाक्षिणात्य सिनेसृष्टीतील दिग्दर्शक अशोका के. एस. आणि पृथ्वी अंबर 'सरी'च्या निमित्ताने मराठीत पदार्पण करत आहेत. रिलायन्स एंटरटेनमेंटने या चित्रपटाच्या वितरणाची धुरा सांभाळली आहे.

सस्पेन्स थ्रिलर ‘शातिर  THE BEGINNING’  मराठी चित्रपट

जागतिक महिला दिनाचे औचित्य साधून श्रीयांस आर्ट्स अँड मोशन पिक्चर्सच्या वतीने एका हटके विषयावरील चित्रपटाची निर्मिती करण्यात येत आहे. 'शातिर THE BEGINNING' असे या मराठी चित्रपटाचे नाव आहे. चित्रपटाची कथा- सुनील वायकर आणि हेमंत एदलाबादकर यांची आहे. पटकथा आणि दिग्दर्शन सुनील वायकर यांचे त्यांचा हा दिग्दर्शक म्हणून पहिलाच चित्रपट आहे. रेश्मा वायकर निर्मित्या आहेत. या चित्रपटाची कथा कॉलेजमध्ये घडलेल्या एका खळबळजनक घटनेवर आधारित असून चित्रपटाचे चित्रीकरण अंतिम टप्प्यात आले आहे. चित्रपटाला रोहित नागभिडे यांचे संगीत लाभले असून गीतकर वैभव देशमुख यांच्या गीतांना वैशाली सामंत, शाल्मली खोलगडे यांचा स्वरसाज आहे.

सचिन तेंडुलकरने महिला दिनाच्या मुहुर्तावर केली “बाईपण भारी देवा” च्या प्रदर्शनाची तारीख जाहिर!

आज आंतरराष्ट्रीय महिला दिनाच्या निमित्ताने ‘बाईपण पण भारी देवा’ या चित्रपटाच्या प्रदर्शनाची तारीख जाहीर करण्यात आली असून, स्त्रीत्वाचा बहुमान साजरा करणारा हा चित्रपट ३० जून रोजी प्रदर्शित होणार होईल. सचिन तेंडुलकरने आपल्या सोशल मिडिया माध्यमांव्दारे याची माहिती दिली आहे. त्याने आपल्या अकाउंट वर असे लिहीले आहे की, "आई, बहीण, बायको, मुलगी अशा रुपांत स्त्रीत्व साजरे करत सतत जिंकणाऱ्या स्त्रीचा सन्मान व्हायला व्हावा असे मला नेहमी वाटते. तिचे आयुष्य किती भारी असते हे मी अनुभवले आहे. आणि आता तुम्हीही ते अनुभवू शकता, ३० जूनला “बाईपण भारी देवा” हा चित्रपट पाहताना... खूप शुभेच्छा ! " स्त्रीच्या वेगवेगळ्या छटा, आयुष्याकडे बघण्याचा दृष्टीकोन, आणि तिचं अष्टपैलू व्यक्तिमत्त्व सिद्ध करता करता, "थांब, जरा श्वास घे" म्हणत तिच्या कौशल्याला दाद देणारी ही कहाणी आहे.या सहा जणी जेव्हा नाईलाजास्तव म्हणा एकत्र येतात तेंव्हा त्यांच्याही नकळत त्यांच्या भूतकाळावर आणि वैयक्तिक संघर्षांवर मात करत असताना त्यांच्या मनाची, भावनांची होणारी घालमेल, उडणारा गोंधळ यांचा मजेदार प्रवास यात घडताना दिसतो.जिओ स्टुडिओज प्रस्तुत, ज्योती देशपांडे, माधुरी भोसले निर्मित, बेला शिंदे आणि अजित भुरे सह-निर्मित, आणि केदार शिंदे द्वारा दिग्दर्शित या चित्रपटात, रोहिणी हट्टंगडी, वंदना गुप्ते, सुकन्या मोने, शिल्पा नवलकर, सुचित्रा बांदेकर आणि दीपा परब यांच्या भूमिका आहेत.

‘फकाट’चा हायली कॉन्फिडेन्शिअल ॲक्शन कॅामेडी धिंगाणा

'बघतोस काय मुजरा कर', 'बस स्टॉप', 'बाबू बॅन्ड बाजा', 'ऑनलाईन बिनलाईन',' मी पण सचिन' यांसारखे चित्रपट दिल्यानंतर आता श्रेयश जाधव आणखी एक चित्रपट घेऊन येण्यास सज्ज झाले आहेत. यापूर्वी श्रेयश जाधव यांनी 'मी पण सचिन'चे लेखन, दिग्दर्शन केले होते. आता आणखी एका नवीन चित्रपटाचे लेखन, दिग्दर्शन त्यांनी केले आहे. 'फकाट' असे आगळेवेगळे नाव असणारा हा चित्रपट १२ मे रोजी प्रदर्शित होईल. हायली कॉन्फिडेन्शिअल धिंगाणा असलेल्या या चित्रपटात हेमंत ढोमे, अविनाश नारकर, सुयोग गोऱ्हे यांच्या प्रमुख भूमिका आहेत. वक्रतुंड एंटरटेनमेंट, गणराज स्टुडिओ प्रोडक्शन प्रस्तुत या चित्रपटाच्या नीता जाधव निर्मात्या आहेत. पोस्टरवर हेमंत ढोमे आणि सुयोग गोऱ्हे यांच्या दोघांच्या मध्ये अविनाश नारकर एक पाकीट घेऊन उभे आहेत. या पाकिटावर कॉन्फिडेन्शिअल असे लिहिले आहे. आता या पाकिटात काय गुपित दडले आहे, याचे उत्तर मिळण्यासाठी वाट पाहावी लागेल.

सचिन पिळगावकर यांना जयशंकर दानवे कलायात्री पुरस्कार

कोल्हापुरात 'नटश्रेष्ठ जयशंकर दानवे कलायात्री पुरस्कार' ज्येष्ठ रंगकर्मी श्री. सचिन पिळगांवकर यांना प्रदान करण्यात आला. मराठी व हिंदी चित्रपटसृष्टीत पन्नासपेक्षा जास्त वर्षे सचिन पिळगावकर यशस्वीपणे कार्यरत आहेत यासाठी त्यांना हा पुरस्कार देण्यात आला. तसेच त्यांच्या जाहीर मुलाखतीचेही आयोजन करण्यात आले होते. यावेळी राजदर्शन जयशंकर दानवे, , सौ.जाई अभिजित भागवत,डॉ.सुजय पाटील,आशिष भागवत, सचिन पिळगांवकर,राजदर्शन दानवे, जयश्री दानवे,सुधीर पेटकर,समृद्धी आशिष भागवत हे उपस्थित होते.