“#नवरा_माझा_नवसाचा_2′ चित्रपटाचा प्रवास २० सप्टेंबरपासून

सचिन पिळगावकर दिग्दर्शित "नवरा माझा नवसाचा" या चित्रपटानंतर १९ वर्षानंतर या चित्रपटाचा सिक्वल म्हणजेच "नवरा माझा नवसाचा 2" हा चित्रपट २० सप्टेंबरपासून प्रदर्शित होईल. या चित्रपटाची कथा कोकण रेल्वे प्रवासात घडणार आहे. मुंबई येथील श्री. सिद्धिविनायक मंदिर येथे चित्रपटाची रिलीज डेट जाहीर करण्यात आली. याप्रसंगी चित्रपटाचे निर्माते दिग्दर्शक सचिन पिळगांवकर, अभिनेत्री सुप्रिया पिळगांवकर आणि महाराष्ट्र भूषण अशोक सराफ उपस्थित होते. या चित्रपटाची निर्मिती, कथा - पटकथा आणि दिग्दर्शन सचिन पिळगांवकर यांनी केलं आहे . संवाद संतोष पवार यांचे आहेत. चित्रपटाच्या रिलीज डेटचा एक टीजर देखील सोशल मीडियावर लाँच करण्यात आला आहे. चित्रपटात सचिन पिळगांवकर, सुप्रिया पिळगांवकर, अशोक सराफ, स्वप्नील जोशी, हेमल इंगळे, निर्मिती सावंत वैभव मांगले आणि सिद्धार्थ जाधव यांच्या प्रमुख आहेत. चित्रपटात बस कंडक्टर असलेले अशोक सराफ आता "नवरा माझा नवसाचा 2"मध्ये तिकीट चेकर अर्थात टीसी आहेत.

‘लाईफलाईन’ चा उत्सुकता वाढवणारा ट्रेलर प्रदर्शित

डॉक्टरांचे आधुनिक विचार आणि किरवंतामध्ये खोलवर रुजलेली परंपरेची मुळे या दोघांमधील वैचारिक तफावत दाखवणारा 'लाईफलाईन' चित्रपट या चित्रपटाचा ट्रेलर प्रदर्शित झाला आहे. अशोक सराफ, माधव अभ्यंकर, भरत दाभोळकर, हेमांगी कवी, जयवंत वाडकर, शर्मिला शिंदे, सुश्रुत मंकणी, अवधूत गुप्ते यांच्या उपस्थितीत 'लाईफलाईन' चित्रपटाचा ट्रेलर लाँच सोहळा पार पडला. ट्रेलरमध्ये डॉक्टर आणि किरवंताची लढाई दाखवण्यात आली असून ज्ञान आणि विज्ञान एकत्र आले तर कित्येक गरजूंचे प्राण वाचू शकतील, या मताचे डॉक्टर आहेत तर माणसाच्या आयुष्यात दोनच जण महत्वाचे असतात, एक भगवंत जो जन्म देऊन खाली पाठवतो आणि दुसरा किरवंत जो निरोप देऊन वर पाठवतो, या विचारसरणीचे किरवंत आहेत. त्यामुळे या लढाईत कोण जिंकणार, हे पाहाणे औत्सुक्याचे ठरणार आहे. दरम्यान, आयुष्याचा प्रवास संपतो तेव्हा एका नवीन आयुष्याचा प्रवास सुरु होतो, याची जाणीव करून देणारा हा चित्रपट आहे. क्रिसेंडो एंटरटेनमेंट प्रस्तुत 'लाईफलाईन' चित्रपटाचे दिग्दर्शन साहिल शिरवईकर यांनी केले असून कथा, पटकथा आणि संवाद राजेश शिरवईकर यांचे आहेत. तर अशोक पत्की यांचे संगीत लाभलेल्या या चित्रपटातील गाणी अवधूत गुप्ते आणि माधुरी करमरकर यांनी गायली आहेत. लालजी जोशी, कविता शिरवईकर, अमी भुता, मिलिंद प्रभुदेसाई, उदय पंडित, संचिता शिरवईकर, संध्या कुलकर्णी, शिल्पा मुडबिद्री आणि क्रिसेंडो एंटरटेनमेंट चित्रपटाचे निर्माते आहेत. दिग्दर्शक साहिल शिरवईकर म्हणतात, " दिग्दर्शक म्हणून हा माझा पहिलाच चित्रपट आहे आणि पहिल्याच चित्रपटात अशोक सराफ आणि माधव अभ्यंकर यांसारखे दिग्गज कलाकार असणे, ही माझ्यासाठी खूपच मोठी गोष्टी आहे. व्यक्तिरेखा ठरल्यावर ज्यावेळी कलाकारांची निवड करण्याची वेळी आली, तेव्हा माझ्या मनात ही दोन नावे आधी आली. त्यानुसार मी अशोक सराफ सरांना भेटण्यासाठी त्यांच्या घरी गेलो होतो. त्यावेळी त्यांच्या समोर अनेक चित्रपटांच्या स्क्रिप्ट्स होत्या. सरांनी मला विचारले, एवढे चित्रपट असताना मी या चित्रपटाला होकार का द्यावा? यावर मी माझी स्क्रिप्ट त्यांना वाचून दाखवली आणि त्यामागची माझी भावनाही पटवून दिली. सरांचा होकार माझ्यासाठी फार आनंदाची बाब होती. चित्रपटातील सगळे कलाकार उत्कृष्ट आहेत. प्रत्येक कलाकाराची इंडस्ट्रीमध्ये एक वेगळी ओळख आहे. चित्रपटाबद्दल सांगायचे तर आधुनिक विज्ञान आणि जुन्या परंपरेमध्ये अडकलेला हा वाद आहे. आता या वादाचा शेवट कसा होतो, याचे उत्तर प्रेक्षकांना चित्रपट पाहूनच मिळणार आहे. 'लाईफलाईन'च्या निमित्ताने सामाजिक जागरूकता पसरवण्याचाही प्रयत्न केला आहे.'' अशोक सराफ म्हणतात, ‘’ ज्यावेळी साहिलने मला चित्रपटाबद्दल सांगितले, त्यावेळी स्क्रिप्ट वाचल्यानंतर मी त्याला पहिला प्रश्न विचारला किरवंताची व्यक्तिरेखा कोण साकारणार आहे, त्यावेळी त्याने माधव अभ्यंकर यांचे नाव घेतले. तिथेच मला या मुलाची समज कळली. मला हा विषय आवडला. प्रत्येकाला विचार करण्यास भाग पाडणारा हा चित्रपट आहे.

रुपेरी पडद्यावर झळकणार सायली बांदकर

सायली बांदकर हा एक नवा चेहरा ‘गाभ’ या मराठी चित्रपटातून मोठ्या रुपेरी पडद्यावर झळकणार आहे. शॉर्टफिल्म्स, अल्बम आणि रंगभूमीवर आपल्या अभिनयाची चुणूक दाखविल्यानांतर सायली आता रुपेरी पडद्यावर आपल्या अभिनयाची जादू दाखवायला सज्ज झाली आहे. २०१७ च्या सवाई एकांकिकेमध्ये सर्वोत्कृष्ट अभिनेत्रीच पारितोषिक पटकावणारी, हेमोलिम्फ, आय आम वूमन, मिसिंग जॅक यासारख्या हिंदी शॉर्टफिल्मस मध्ये केमिओ करणारी तसेच यदाकदाचित,अलबत्या गलबत्या या नाटकांमधून झळकलेली सायली ‘गाभ’ चित्रपटात कैलास वाघमारेसोबत स्क्रीन शेअर करणार आहे. सायली सांगते की, ‘वास्तवतेच्या जवळ जाणारी भूमिका मला ‘गाभ’ या चित्रपटात साकारायला मिळाली आहे. फुलवा ही व्यक्तिरेखा मी यात साकारली आहे. गावखेड्याची पार्श्वभूमी असलेल्या या चित्रपटाची कथा रेड्याभोवती फिरते. प्राण्यांशी माझी फारशी जवळीक नाही मात्र या चित्रपटानंतर माझ्यात प्राण्यांबाबत वेगळी आत्मीयता निर्माण झाली.आपण जे बोलतो ते प्राण्यांना समजतं. त्यांना सांभाळताना कोडिंग किंवा काही टेक्निकलक्षात घेतलं की, आपली त्यांच्यासोबत गट्टी होऊ शकते. सामान्यांच्या जगण्याचं प्रतिबिंब यात प्रत्येकाला पहायला मिळेल. चित्रपटाबाबत सायली म्हणाली की, हा चित्रपट माझ्यासाठी स्पेशल आहे. या चित्रपटाने मला नवी वाट दाखवली. कैलास यांच्याकडून मोलाचं मार्गदर्शन लाभलं. यापुढे एक प्रयोगशील अभिनेत्री म्हणून स्वत:ला सिद्ध करण्याचा नेहमीच प्रयत्न असेल. या चित्रपटाची संकल्पना, लेखन आणि दिग्दर्शन अनुप जत्राटकर यांचे आहे. टाईमलॅप्स प्रोडक्शन आणि एजे मल्टिमीडिया प्रोडक्शनची निर्मिती असलेल्या या चित्रपटाचे निर्माते सुमन नारायण गोटुरे आणि मंगेश नारायण गोटुरे आहेत. सहनिर्माते अनुप जत्राटकर आहेत.आपल्या माजाला आलेल्या म्हशीसाठी रेडा शोधताना नायकामध्ये माणूस म्हणून होणारा बदल आणि त्याची गावच्या रांगड्या मातीच्या पार्श्वभूमीवरील ‘ गाभ’ ही कथा नक्कीच भावेल. २१ जूनला ‘गाभ’ प्रदर्शित होणार आहे.

‘#अल्याड_पल्याड’ चित्रपटाच्या पोस्टरचे अनावरण

प्रीतम एस के पाटील दिग्दर्शित ‘अल्याड पल्याड' या चित्रपटाचा पोस्टर अनावरण सोहळा संपन्न झाला. एस. एम.पी प्रोडक्शन् अंतर्गत या चित्रपटाची निर्मिती शैलेश जैन आणि महेश निंबाळकर यांनी केली आहे. गौरव मोरे, सक्षम कुलकर्णी, सुरेश विश्वकर्मा, अनुष्का पिंपुटकर आदी कलाकारांसोबत भाग्यम जैन हा नवा चेहरा या चित्रपटात आहे. या चित्रपटाची कथा प्रीतम एस के पाटील यांची असून पटकथा संवाद संजय नवगिरे यांचे आहेत. दिग्दर्शक प्रीतम एस के पाटील म्हणाले की,वेगळ्या विषयावरचा ‘अल्याड पल्याड' चित्रपट करताना खूप मजा आली. उत्तम कलाकारांच्या टीमसोबत एका वेगळ्या विषयावर चित्रपट करण्याची संधी आम्हाला महत्त्वाची वाटल्यामुळे चित्रपट निर्मितीसाठी पुढाकार घेतल्याचे निर्माते शैलेश जैन आणि महेश निंबाळकर यांनी यावेळी सांगितले. ‘एका चांगल्या चित्रपटाचा भाग होता आल्याचा आनंद अभिनेता गौरव मोरे ने व्यक्त केला. ‘शूटिंग करताना आम्ही धमाल केली ती धमाल पदड्यावर प्रेक्षकांना नक्की आनंद देईल, असा विश्वास सक्षम कुलकर्णीने व्यक्त केला. उत्तम कलाकारांसोबत काम करताना मला खूप काही शिकायला मिळाल्याच सांगताना, हा चित्रपट करणं माझ्यासाठी सुवर्णसंधी असल्याचं भाग्यम जैनने सांगितलं. दिग्दर्शक प्रीतम एस के पाटील यांच्यासोबत काम करणं मी माझ्यासाठी नेहमीच आनंददायी असल्याचं अभिनेते सुरेश विश्वकर्मा यांनी सांगितलं. या चित्रपटाचे छायांकन योगेश कोळी यांचे तर संकलन सौमित्र धरसुलकर यांचे आहे. कलादिग्दर्शन योगेश इंगळे यांचे आहे. कार्यकारी निर्माते संतोष खरात आहेत.

कोल्हापूरच्या अनेक रत्नावर बायोपिक होऊ शकते : संदीप कुलकर्णी

(फोटोत डावीकडून डॉ.सुजय पाटील, आशिष भागवत, संदीप कुलकर्णी, राजदर्शन दानवे, जयश्री दानवे, सुधीर पेटकर.) ‘ कोल्हापूरच्या मातीमध्ये अभिनयातील दादा लोक होऊन गेले. अशी अनेक रत्ने आहेत ज्यावर बायोपिक होऊ शकते. अशा ठिकाणचा पुरस्कार हा माझ्यासाठी अविस्मरणीय आहे.’ असे प्रतिपादन अभिनेते संदीप कुलकर्णी यांनी दानवे परिवारातर्फे देण्यात आलेल्या कलायात्री पुरस्कार प्रसंगी केले. शाहू स्मारक भवन,कोल्हापूर येथे १४ वा कलायात्री पुरस्कार प्रदान करण्यात आला. मराठी सिनेसृष्टीमध्ये खलनायक व नाट्य दिग्दर्शक म्हणून काम केलेले नटश्रेष्ठ जयशंकर दानवे यांच्या नांवे दरवर्षी कलायात्री पुरस्कार देण्यात येतो. शाल, श्रीफळ, सन्मानपत्र, सन्मानचिन्ह असे पुरस्काराचे स्वरूप असून या पुरस्काराच्या वेळी त्यांची प्रकट मुलाखत घेण्यात आली. कमला कॉलेजचे मराठी विभागाचे प्रमुख डॉ.सुजय पाटील यांनी ही मुलाखत घेतली. श्वास, डोंबिवली फास्ट, डोंबिवली रिटर्न, गैर, टेरिटरी, मम्मो, हजारो ख्वाईशे ऐसी, हथियार, शूल, ट्रॅफिक सिग्नल, डी-डे असे अनेक मराठी हिंदी चित्रपट तसेच गुंतता हृदय हे, अवंतिका अशा मालिकातून संदीप कुलकर्णी हे घरोघरी पोचले आहेत. ते प्रथम चित्रकार होते. चित्रकार ते अभिनेता हा त्यांचा प्रवास याप्रसंगी उलगडला. यावेळी जयशंकर दानवे यांची कन्या ज्येष्ठ लेखिका जयश्री दानवे यांच्या ‘स्वरांचे चांदणे (गायक-गायिका), अनवट (मराठी संगीतकार), आस्वाद (कथासंग्रह) या ३ पुस्तकांचे प्रकाशन पाहुण्यांच्या हस्ते झाले. यावेळी कोल्हापूरचे प्रकाशक जीवन जोशी, अनुपमा घाटगे डॉ.सुजय पाटील यांचा सत्कार करण्यात आला. सन्मानपत्र वाचन केले जयश्री दानवे यांनी. अनुपमा घाटगे यांनी सूत्रसंचालन केले तर राजदर्शन दानवे यांनी आभार मानले. यावेळी आशिष भागवत, सुधीर पेटकर यांच्यासह कोल्हापूरातील अनेक मान्यवर रसिक उपस्थित होते.

“जन्मऋण”ची विलक्षण कथा

अभिनेत्री, लेखिका, निर्माती आणि दिग्दर्शिका कांचन अधिकारी एक वेगळा विषय घेऊन येत आहेत. एका गाजलेल्या सत्यघटनेवरून प्रेरित होऊन त्यांनी 'जन्मऋण' या चित्रपटाची निर्मिती केली आहे. मूल जन्माला येताना आई व मुलातील नाळ कापली जाते आणि तिथेच तो एक व्यक्ती म्हणून उदय पावतो. नाळ कापली तरी आई-बापाचं मुलांप्रतीचं प्रेम मात्र कधीच कमी होत नाही. पण मुलं मोठी झाली की पालकांची संपत्ती, मालमत्ता किती आहे याचा विचार करताना दिसतात. पालक मात्र यापासून अनभिज्ञ असतात. जेव्हा मुलांना पालकांच्या अस्तित्वापेक्षा त्यांच्या मालमत्तेचा मोह पडतो तेव्हा काय होतं? पालकांनी अशावेळी काय करावे? मुलांमध्ये होणारे बदल कसे ओळखावे? नातेसंबंधाकडे कोणत्या दृष्टीने पहावे? बदलत्या काळानुसार त्याची पावलं कशी ओळखावी? याच विषयावर आधारित हा चित्रपट आहे. 'श्री गणेश फिल्म्स' निर्मित आणि 'श्री. अधिकारी ब्रदर्स' प्रस्तुत या चित्रपटात मनोज जोशी, सुकन्या कुलकर्णी, सुशांत शेलार, धनंजय मांद्रेकर, तुषार आर.के., अनघा अतुल आणि खास भूमिकेत पाहुणे कलाकार म्हणून हिंदी मालिका - चित्रपट महेश ठाकूर यांनी आहेत. सुरेश देशमाने छायाचित्रणकार असून संगीतकार वैशाली सामंत आणि गायक सुदेश भोसले, वैशाली सामंत यांच्या संगीत सुरावटीने ही कथा रंग भरते.

नामदेव ढसाळ यांचा झंझावात झळकणार मोठ्या पडद्यावर

द बायोस्कोप फिल्म्सने महान बंडखोर कवी आणि दलित पँथर चळवळीचे संस्थापक नामदेव ढसाळ यांच्या जीवनावर आधारित ‘ढसाळ’ या बायोपिकच्या निर्मितीचे अधिकार त्यांच्या कुटुंबाकडून अधिकृतपणे घेतले असून दोन वर्षांच्या अत्यंत सखोल संशोधन व अभ्यासानंतर हा चित्रपट तयार होत आहे.संजय पांडे निर्मित, वरुणा राणा लिखित आणि दिग्दर्शित, प्रताप गंगावणे यांच्या संवादांसह, या बायोपिकमध्ये ढसाळ यांच्या अन्याय आणि शोषणाविरुद्धच्या संघर्षाचे वास्तववादी चित्रण करण्यात येणार आहे. यानिमित्ताने संजय पांडे म्हणाले की, ‘’ पद्मश्री नामदेव ढसाळ म्हणजे वादळ. सोशीत आणि अन्यायाने पीडलेल्या दलित समाजाला नवसंजीवनी देणारा, शब्दात विद्रोहाची आग असलेला पॅंथर, महाराष्ट्राच्या साहित्याला ग्लोबल करणारा पहिला कवी. त्यांचं जीवन चरित्र म्हणजे एक ज्वलंत मशाल आहे. महाराष्ट्रच काय संपूर्ण देशात दलित पॅंथरने एक राजकीय व सामाजिक वादळ तयार केलं होतं. त्यांच्या जीवनावर चित्रपट करणे हे एक निर्माता म्हणून माझं सौभाग्य आहे आणि आव्हान ही आहे. पद्मश्री नामदेव ढसाळ यांच्या सर्व देश विदेशातील चाहत्यांसाठी, विद्यार्थी आणि कार्यकर्ते यांच्यासाठी ही पर्वणी असेल.’’लेखक आणि दिग्दर्शिका वरुणा राणा म्हणाल्या, "काही गोष्टी ह्या सांगायलाच पाहिजे कारण त्या आपल्याला विचार करण्यास भाग पाडतात. ढसाळ यांचे जीवन ही अशीच एक कथा आहे. खेडेगावातील महारवाड्यात जन्मलेल्या, मुंबईतील कामाठीपुरा येथे बालपण गेलेल्या ढसाळांनी जागतिक पातळीवर आपल्या कवितेचा ठसा उमटविला. त्यांच्या कट्टर दलित पँथर चळवळ आणि त्यांच्या बंडखोर कवितेतून त्यांनी दलित आणि गरिबांच्या हक्कांसाठी अथक लढा दिला. ढसाळ हे व्यक्तीपेक्षा एक जास्त शक्तिशाली, प्रक्षोभक विचार होता आणि हा विचार मला आव्हानात्मक वाटला म्हणून तो तमाम लोकांपर्यंत पोहचविण्यासाठी एक चित्रपट दिग्दर्शक म्हणून माझे त्याला प्राधान्य राहील. जातीच्या फिल्टर शिवाय त्यांचे विचार हे सर्व समाजाच्या अंतःकरणाला थेट भिडू शकतात कारण हे विचार कालातीत आहेत.’’ नामदेव ढसाळ यांच्या पत्नी मल्लिका अमर शेख म्हणाल्या,१५ फेब्रुवारी नामदेवचा जन्मदिवस..दहा वर्षे झाली नामदेव ढसाळ नावाचा झंझावात शांत झाल्याला. नामदेवच समग्र कलंदरपण, विचारीपण, कविमन आणि माणसांप्रती असलेला प्रचंड जिव्हाळा या साऱ्या गोष्टी आपल्याला त्यांच्या ढसाळ चित्रपटातून दिसून येईल. या चित्रपटात नामदेवच नाही तर त्याच्या समग्र जीवनाबरोबरच त्यावेळची क्रांतिकारक परिस्थिती, त्यावेळचं राजकारण, पूर्ण दलित पँथर ची दहशत असलेली चळवळ असं सर्वांगीण समाजाचाच लेखाजोगा उभा राहील. त्याची बायोपिक हे फक्त वरुणाजींचं स्वप्नच नाही तर हा एक महत्वाचा ऐतिहासिक 'बखरनामाच'आहे.

‘ नटश्रेष्ठ जयशंकर दानवे कलायात्री पुरस्कार अभिनेते संदीप कुलकर्णी यांना जाहीर ’

कोल्हापूर येथील दानवे परिवारातर्फे मराठी सिनेसृष्टीत खलनायक व नाट्य दिग्दर्शक म्हणून प्रसिद्ध नटश्रेष्ठ जयशंकर दानवे यांच्या नांवे दरवर्षी कलायात्री पुरस्कार प्रदान करण्यात येतो. यंदाचा १४ वा ‘नटश्रेष्ठ जयशंकर दानवे कलायात्री पुरस्कार’ रंगकर्मी संदीप कुलकर्णी यांना देण्यात येणार आहे. १ मार्च २०२४ रोजी सायं.५.३० वाजता शाहू स्मारक भवन, दसरा चौक येथे हा पुरस्कार सोहळा संपन्न होणार आहे. शाल, श्रीफळ, सन्मानपत्र, सन्मानचिन्ह असे पुरस्काराचे स्वरूप आहे. त्यांच्या आजपर्यंतच्या कार्याचा गौरव म्हणून त्यांना हा पुरस्कार दिला जाणार आहे. याप्रसंगी जयशंकर दानवे यांची कन्या ज्येष्ठ लेखिका जयश्री दानवे यांच्या ‘स्वरांचे चांदणे (गायक-गायिका), अनवट (मराठी संगीतकार), आस्वाद (कथासंग्रह) या ३ पुस्तकांचे प्रकाशन मान्यवरांच्या हस्ते होईल. कलायात्री पुरस्कार वितरणानंतर संदीप कुलकर्णींच्या प्रकट मुलाखतीतून त्यांच्या अभिनय प्रवासाचा आढावा घेतील ताराराणी विद्यापीठातील कमला कॉलेजच्या मराठी विभागाचे प्रमुख प्रा.डॉ.सुजय पाटील . अशी माहिती कार्यक्रमाचे संयोजक जयश्री दानवे, राजदर्शन दानवे, सुधीर पेटकर यांनी दिली आहे.

“भिशी मित्र मंडळ” चित्रपटाचा पुणे येथे मुहूर्त

"भिशी मित्र मंडळ" या चित्रपटाचा मुहूर्त झाला. याप्रसंगी प्राजक्ता माळी, चित्रपटाचे निर्माते, प्रस्तुतकर्ते, लेखक, दिग्दर्शक आणि तांत्रिक टीम आवर्जून उपस्थित होती. अमोल कागणे आणि शरद पाटील हे या चित्रपटाचे प्रस्तुतकर्ते आहेत तर किरण कुमावत, लक्ष्मण कागणे, विनया मोरे, अजिंक्य जाधव, अक्षय बोडके आणि गौरी पाठक हे या चित्रपटाचे निर्माते आहेत. सागर पाठक लिखित, सुमित संघमित्र दिग्दर्शित या चित्रपटाचे चित्रीकरण आता पुणे येथे सुरु होणार असून संजीवकुमर चंद्रकांत हिल्ली ये सिनेमाटोग्राफर आहेत.   भिशी म्हणजे,  ग्रुपमधील सदस्य प्रत्येक महिन्याला ठराविक पैसे एकत्र करून ते टप्प्याटप्प्याने सर्वांना वापरण्यासाठी दिले जातात. साधारणत: प्रत्येक महिन्याला ग्रुपमधील एका सदस्याच्या घरी किंवा त्यांनी ठरवलेल्या एका ठिकाणी जमून, पैसे गोळा करून ते एक सदस्याला दिले जातात. भिशी हा प्रकार विशेषत: महिला, कामगार आणि व्यापाऱ्यांमध्ये अधिक प्रचलित आहे. 

प्रतीक गांधी यांनी केली अनंत महादेवन यांच्या ‘आता वेळ झाली’ची घोषणा

अनंत नारायण महादेवन दिग्दर्शित, लिखित 'आता वेळ झाली' या चित्रपटाचे पहिले पोस्टर सोशल मीडियावर झळकले असून पोस्टरमध्ये दिलीप प्रभावळकर आणि रोहिणी हट्टंगडी आहेत. या चित्रपटाची घोषणा प्रतीक गांधी यांनी आपल्या सोशल मीडियावरुन केली आहे. ‘इफ यू वाँट अ हॅप्पी एण्डिंग, यू मस्ट नो व्हेअर टू एण्ड युअर स्टोरी’ अशी या चित्रपटाची टॅगलाईन आहे. या ओळीचा या चित्रपटाशी नेमका काय संबंध आहे, याचे उत्तर आपल्याला २३ फेब्रुवारी रोजी चित्रपट आल्यावरच कळणार आहे. दिलीप प्रभावळकर, रोहिणी हट्टंगडी यांच्यासह या चित्रपटात भरत दाभोळकर, सुरेश विश्वकर्मा, स्मिता तांबे, जयंत वाडकर, अभिनव पाटेकर यांच्याही प्रमुख भूमिका आहेत. इमेजीन एंटरटेन्मेंट अँड मीडिया,अनंत नारायण महादेवन फिल्म्स यांच्या सहयोगाने या चित्रपटाचे दिनेश बंसल , जी. के. अग्रवाल आणि अनंत महादेवन निर्माते आहेत. चित्रपटाबद्दल अनंत नारायण महादेवन म्हणतात," जीवनाचा शेवट आनंदी व्हावा, असे वाटणाऱ्या प्रत्येक वयस्काच्या अस्तित्वाची गोष्ट सांगणारा हा चित्रपट आहे. हा चित्रपट म्हणजे हृषिकेश मुखर्जींच्या ‘आनंद’ची दुसरी बाजू आहे. इच्छामरण हा एक असा विषय आहे, ज्याने या महामारीच्या काळात मला प्रभावित केले. जेव्हा जगाने जीवन आणि मृत्यूकडे एका वेगळ्या नजरेने पाहाण्यास सुरूवात केली. तरुणाईचाही जीवनाकडे पाहाण्याचा दृष्टीकोन बदलला. भौतिकवादी दृष्टीकोनापेक्षा व्यावहारिक दृष्टीकोनाकडे त्यांचा कल वाढला. हा चित्रपट पाहून वृद्धांच्या मनातील घालमेल तरूणाईला नक्कीच कळेल.’’ डेल्लास आंतरराष्ट्रीय चित्रपट महोत्सव, पुणे आंतरराष्ट्रीय चित्रपट महोत्सव (सर्वोत्कृष्ट अभिनेता), राजस्थान आंतरराष्ट्रीय चित्रपट महोत्सव (सर्वोत्कृष्ट चित्रपट आणि सर्वोत्कृष्ट दिग्दर्शक) आणि लोकप्रिय जागरण चित्रपट महोत्सव, शारजाह फिल्म प्लॅटफॅार्म इंटरनॅशनल फेस्टिव्हलमध्ये ज्युरी अवॅार्ड यांसारख्या अनेक आंतरराष्ट्रीय महोत्सवांसाठी या चित्रपटाची यापूर्वीच निवड झाली आहे.