‘वेडात_मराठे_वीर_दौडले_सात’चे चित्रीकरण वेगात सुरू

छत्रपती शिवाजी महाराज यांच्यावर आधारित ‘वेडात मराठे वीर दौडले सात’ या महेश मांजरेकर दिग्दर्शित, वसीम कुरेशी निर्मित चित्रपटाचे चित्रीकरण सध्या वेगात सुरू आहे. या चित्रपटात अभिनेता अक्षय कुमार छत्रपती शिवाजी महाराजांची भूमिका साकारत आहे. शिवकालीन इतिहासातील एक महत्त्वाची घटना ऐतिहासिकपटाच्या भव्यदिव्य रुपात प्रेक्षकांसमोर ठेवणाऱ्या या चित्रपटासाठी खूप सखोल संशोधन करण्यात आले आहे. दिग्दर्शन आणि पटकथा लेखन हे दोन्ही शिवधनुष्य महेश मांजरेकर यांनी या चित्रपटासाठी पेलले असून हा चित्रपट खूप चांगल्या पध्दतीने प्रेक्षकांपर्यंत पोहोचावा यासाठी चित्रिकरणात कोणतीही त्रुटी राहू नये यासाठी मांजरेकर प्रचंड मेहनत घेत आहेत, असे कौतुक चित्रपटाचे निर्माते वसीम कुरेशी यांनी केले. छत्रपती शिवाजी महाराजांची भूमिका साकारणे हे माझे स्वप्न होते. या स्वप्नपूर्तीच्या क्षणासाठी मी शंभर टक्के प्रयत्न करीत आहे. महेश मांजरेकर यांच्या मार्गदर्शनामुळे शिवाजी महाराजांची भूमिका करणे सोपे झाले आहे, अशी भावना अक्षय कुमारने व्यक्त केली. ‘वेडात मराठे वीर दौडले सात’ हा बहुभाषिक चित्रपट असून या चित्रपटात जय दुधाणे, उत्कर्ष शिंदे, विशाल निकम, विराट मडके, हार्दिक जोशी, सत्या मांजरेकर, अक्षय कुमार, नवाब खान आणि प्रवीण तरडे यांच्या महत्त्वाच्या भूमिका आहेत.

‘जननी’ चित्रपटाचा ‘अल्ट्रा झकास’ मराठी ओटीटीवर ‘वर्ल्ड डिजिटल प्रीमियर’

'अल्ट्रा झकास' या मराठी ओटीटी प्लॅटफॉर्मने दर आठवड्याला नवीन कॉन्टेन्ट आणत आहेत. 'जननी' हा चित्रपट २९ मे २०२३ रोजी प्रदर्शित होईल. या चित्रपटाची कथा विचारप्रवर्तक आणि भावनिकरित्या मातृत्वाच्या नातेसंबंध, कौटुंबिक बंध आणि वैयक्तिक वाढ यांच्या गुंतागुंतीचे वर्णन करून मांडण्यात आली आहे. आईच्या आपल्या मुलांवरील प्रेमाचा आणि आपल्या मुलांच्या सुखासाठी सर्वतोपरी प्रयत्न करणाऱ्या या चित्रपटात भाग्यश्री पटवर्धन, मोहनीश बहल, आयेशा झुल्का, अमन वर्मा, विनीत रैना आणि सोनिका हंडा या कलाकारांच्या भूमिका असलेल्या या चित्रपटाच दिग्दर्शन चंदर एच. बहल यांचे आहे, तर अल्ट्रा मीडिया अँड एंटरटेनमेंट यांनी या चित्रपटाची निर्मिती केली आहे. हा चित्रपट संपूर्णपणे मराठी भाषेत अल्ट्रा झकास या मराठमोळ्या ओटीटीवर पाहता येईल.

‘गेमाडपंथी’ सज्ज

हेमाडपंथी... दगड एकमेकांत गुंफून केलेल्या बांधकामाची एक स्तुत्य शैली. आपण सर्वांनीच या शैलीचा इतिहासात अभ्यास केलेला आहे. हेमाडपंथीशीच साधर्म्य साधणारा शब्द म्हणजे 'गेमाडपंथी'. ही कोणती नवीन शैली? तर दगड एकमेकांच्या डोक्यात घालून केलेल्या गेमची एक शैली. ही शैली नेमकी काय आहे, तर याचे उत्तर तुम्हाला मिळणार आहे, प्लॅनेट मराठी ओटीटीवर. 'गेमाडपंथी' या वेबसीरिजचे बोल्ड टिझर सोशल मीडियावर झळकले आहे. अ प्लॅनेट मराठी ओरिजनल, दि फिल्म क्लिक स्टुडिओज प्रस्तुत, संतोष कोल्हे दिग्दर्शित या वेबसीरिजमध्ये चैतन्य सरदेशपांडे, पूजा कातुर्डे, प्रणव रावराणे, उपेंद्र लिमये, नम्रता संभेराव, समीर पाटील, दिगंबर नाईक, सविता मालपेकर, अंकुर वाडवे, मीरा सारंग अशी स्टारकास्ट आहे. टिझरमध्ये सुरुवातीलाच पूजा कातुर्डे मादक अंदाजात दिसत असून प्रणव रावराणेला ती तिच्या प्रेमाच्या जाळ्यात ओढत आहे. तर दुसरीकडे कोणाला तरी किडनॅप करण्याचा प्लॅन शिजत असल्याचे कळतेय. आता हे किडनॅपिंग कोणाचे आणि कशासाठी आहे, हे 'गेमाडपंथी' प्रदर्शित झाल्यावरच कळेल. प्लॅनेट मराठीचे प्रमुख, संस्थापक अक्षय बर्दापूरकर म्हणतात, '' प्लॅनेट मराठीने आतापर्यंत वेगवेगळे विषय हाताळले आहेत. हासुद्धा कॅामेडीचा वेगळा जॅानर आहे.

स्वप्नांचा प्रवास उलगडणारा ‘बटरफ्लाय’

मीरा वेलणकर यांचं दिग्दर्शन असलेला 'बटरफ्लाय' हा चित्रपट २ जूनला प्रदर्शित होईल. या चित्रपटाचे पोस्टर सोशल मीडियावर लाँच करण्यात आले आहे. ज्येष्ठ अभिनेते, नाट्यनिर्माते अजित भुरे यांनी हा चित्रपट प्रस्तुत केला आहे. असीम एंटरटेन्मेंट आणि अॅप्रोग्रॅम स्टुडिओज यांनी या चित्रपटाची निर्मिती केली आहे. अजित भुरे, अभिजित साटम, मधुरा वेलणकर साटम या चित्रपटाचे निर्माते आहेत. मधुरा वेलणकर साटम यांच्या संकल्पनेला विभावरी देशपांडे यांनी कथेत बांधले आहे. विभावरी देशपांडे आणि मीरा वेलणकर यांनी पटकथा लेखन, तर कल्याणी पाठारे, आदित्य इंगळे यांनी संवाद लेखन केले आहे. वैभव जोशी, गुरू ठाकूर यांनी गीतलेखन, शुभाजित मुखर्जी यांचे संगीत, वासुदेव राणे यांचे छायांकन आहे. वैशाली भैसने माडे आणि हंसिका अय्यर यांनी चित्रपटातली गाणी गायली आहेत. या चित्रपटात मधुरा वेलणकर साटम, अभिजित साटम, महेश मांजरेकर, राधा धारणे, सोनिया परचुरे, प्रदीप वेलणकर अशी स्टारकास्ट आहे.

मातृत्वदिनी जननीचे पोस्टर रिलीज!

‘अल्ट्रा झकास’ या मराठी ओटीटीने मातृदिनाचे औचित्य त्यांच्या ‘जननी’ या चित्रपटाचे पोस्टर रिलीज केले आहे. भाग्यश्री पटवर्धन आणि आयेशा झुल्का यांच्या भावमुद्रा असलेले 'जननी'चे हृदयस्पर्शी पोस्टर सोशल मीडियावर लक्ष वेधत असून मातृत्व प्रेमाचे भावबंध अधोरेखित करणारी विलक्षण कथा घेऊन येणार आहे. भाग्यश्री पटवर्धन, आयेशा झुल्का यांसह मोहनीश बहल, अमन वर्मा, विनीत रैना आणि सोनिका हंडा या कलाकारांच्या या चित्रपटात भूमिका आहेत. या चित्रपटाचे दिग्दर्शन चंदर एच. बहल यांचे आहे. तर अल्ट्रा मीडिया अँड एंटरटेनमेंट यांनी या चित्रपटाची निर्मिती केली आहे. आईच्या आपल्या मुलांवरील प्रेमाचा आणि आपल्या मुलांच्या सुखासाठी सर्वतोपरी प्रयत्न करणाऱ्या आईच्या मातृत्वाची कथा या चित्रपटात मांडण्यात आली असून मूळ हिंदी असलेला हा चित्रपट मराठी भाषेत खास मराठमोळ्या ओटीटीवर पाहता येईल.

माजी केंद्रीय कृषीमंत्री शरद पवार यांच्या हस्ते “गेट टुगेदर”च्या पोस्टरचे अनावरण!!

माजी केंद्रीय कृषीमंत्री आणि राष्ट्रवादी काँग्रेसचे अध्यक्ष शरद पवार यांच्या हस्ते "गेट टुगेदर" या चित्रपटाच्या पोस्टरचे अनावरण करण्यात आले. 'वय वाढतं पण आठवणी तशाच राहतात' अशी कॅची टॅगलाइन असलेला "गेट टुगेदर" हा चित्रपट २६ मे रोजी प्रदर्शित होईल. सतनाम फिल्म्स प्रस्तुत या चित्रपटाची निर्मिती समीर गोंजारी, संजय गोंजारी, आशिष धोत्रे यांची आहे. चित्रपटाचं पटकथा लेखन आणि दिग्दर्शन सचिन धोत्रे, तर कथा आणि संवाद लेखन प्रवीण कुचेकर यांचे आहे. अजय रणपिसे यांचे संगीत आहे. एकनाथ गिते, त्रिशा कमलाकर, श्रेया पासलकर, इमरान तांबोळी, संजना काळे, मिताली कोळी, सुशांत कोळी, साकिब शेख आदींच्या चित्रपटात प्रमुख भूमिका आहेत.माजी केंद्रीय कृषीमंत्री आणि राष्ट्रवादी काँग्रेसचे अध्यक्ष शरद पवार यांच्या हस्ते चित्रपटाच्या पोस्टरचे अनावरण करण्यात आले. विठ्ठल सहकारी साखर कारखान्याचे अध्यक्ष अभिजित पाटील यावेळी उपस्थित होते.

‘मानाचि संघटनेचा’ ८ वा वर्धापनदिन सोहळा संपन्न

मालिका, नाटक आणि चित्रपटांमध्ये लेखन करणाऱ्या लेखकांच्या हितासाठी कार्यरत असणाऱ्या 'मालिका नाटक चित्रपट' अर्थात मानाचि लेखक संघटनेचा आठवा वर्धापन दिन संपन्न झाला. या सोहळ्यात ज्येष्ठ नाटककार व पटकथाकार गंगाराम गवाणकर यांना 'लेखन कारकीर्द सन्मान पुरस्कार' देऊन सन्मानित करण्यात आले. जाहिरात क्षेत्रात कार्यरत असलेले भरत दाभोळकर या सोहळ्याला प्रमुख पाहुणे म्हणून उपस्थित होते. गतवर्षीचे 'मानाचि'चे लेखन कारकीर्द सन्मान पुरस्कार विजेते ज्येष्ठ लेखक-दिग्दर्शक पुरुषोत्तम बेर्डे यांनी गंगाराम गवाणकर यांना सन्मानपूर्वक रंगमंचावर आणले. 'मानाचि'चे अध्यक्ष विवेक आपटे यांच्या उपस्थितीत दाभोळकरांच्या हस्ते गवाणकर यांना पुरस्कार प्रदान करण्यात आला. पुरस्कार वितरणानंतर विवेक आपटे यांनी मुलाखत घेताना गवाणकरांना बोलतं केलं. गवाणकरांनी आपला बालपणापासूनचा संपूर्ण प्रवास गंमतीशीर पद्धतीने सांगितला. गवाणकरांच्या मिश्किल शैलीत तो ऐकताना उपस्थितांच्या हसून-हसून पोटात अक्षरश: गोळा आला. यात गावापासून मुंबईपर्यंतच्या प्रवासात विमानतळावरील बिगारी काम, जेजे स्कूल आॅफ आर्टसमधल शिक्षण, नाईट हायस्कूलमधील शालेय शिक्षण, फुटपाथवरील जगणं, जीपीओमध्ये नोकरी, साईन बोर्ड रंगवणं, 'वस्त्रहरण' नाटकाचे सुरुवातीचे फसलेले प्रयोग, पु. ल. देशपांडेंनी दाद दिल्यानंतर नाटकाने घेतलेली गरुडझेप सर्व काही सांगितलं. 'मानाचि'ने केलेला गौरव म्हणजे लेखकांनी लेखकाचा केलेला सन्मान असल्याची भावना व्यक्त करताना ही खूप मोठी दाद असल्याचेही गवाणकर म्हणाले. गवाणकरांवर पहिलं प्रेम करणाऱ्या मैसम्मावर रचलेल्या कवितेने त्यांनी आपल्या मुलाखतीची सांगता केली. 'प्रस्थान' या प्रायोगिक नाटकासाठी मकरंद साठे, '३८ कृष्ण व्हिला' या व्यावसायिक नाटकासाठी श्वेता पेंडसे, 'कुर्रर्र...' या नाटकातील गीतासाठी तेजस रानडे, 'फनरल' चित्रपटाच्या कथेसाठी रमेश दिघे, 'वाय' चित्रपटाच्या पटकथेसाठी अजित वाडीकर व स्वप्नील सोज्वळ, 'मीडियम स्पायसी' चित्रपटातील संवादांसाठी इरावती कर्णिक, 'चंद्रमुखी' चित्रपटातील गीतांसाठी गुरू ठाकूर, 'जीवाची होतीया काहिली' मालिकेच्या कथेसाठी सुबोध खानोलकर, 'भाग्य दिले तू मला' मालिकेच्या पटकथेसाठी अमोल पाटील, 'तुमची मुलगी काय करते' व 'आई कुठे काय करते' या मालिकांच्या संवादलेखनासाठी मुग्धा गोडबोले, 'तू तेव्हा तशी' मालिकेच्या गीतासाठी अभिषेक खणकर, लोकसत्तातील 'कस्तुरीगंध' या स्तंभलेखनासाठी प्रा.विजय तापस यांना मानाचि पुरस्कार प्रदान करण्यात आले. खालिदा शेख, अभिराम रामदासी, रूपाली चेऊलकर, संदीप गचांडे व ईश्वरी अतुल यांना लक्षवेधी लेखनासाठी सन्मानित करण्यात आले. भरत दाभोळकरांनी 'वस्त्रहरण'बाबत आपला अनुभव सांगितला. ते म्हणाले की, मी आजवर इंग्रजीमध्ये ३२ नाटकं लिहिली आहेत. यात इंग्रजीमध्ये तमाशा, लावणी, पोवाडा, कव्वाली केली. त्याचा मला खूप अभिमान होता. पॅरडीच्या या अभिमानात मी खूप वर्षे जगलो. कोणीतरी कारण नसताना मला 'वस्त्रहरण' बघायला घेऊन गेलं आणि त्या दिवशी मला पॅरडीची लेव्हल काय असते हे समजलं. त्यानंतर गवाणकरांचं कोणतंही नाटक बघितलं नाही. कारण मला आणखी इन्फेरीआॅरीटी कॅाम्प्लेक्स (न्यूनगंड) वाढवायचा नव्हता. गवाणकरांची एक मुलाखत बघितली होती. ज्यात ते म्हणाले होते की, त्यांच्या नाटकाला पु.ल.देशपांडे आले होते. पुलं म्हणाले होते की 'वस्त्रहरण' नाटक बघण्यापेक्षा काम करायला मला जास्त आवडेल. तो अनुभव मलाही आला. एका प्रयोगात मी, विजू खोटे, विहंग नायक या सर्वांनी गेस्ट अपिरीयन्स केला होता. गवाणकरांनी यापुढेही खूप वर्षे लिहित राहावं असंही दाभोळकर म्हणाले.पुरस्कार स्वीकारल्यानंतर गुरू ठाकूर म्हणाले की, इथे बसल्या-बसल्या दोन ओळी डोक्यांत आल्या. एखाद्या अस्सल गवयाने दुसऱ्याच्या गाण्याला दाद देणं हे जितकं दुर्मिळ आहे तितकंच लेखकानेही लेखकाचं कौतुक करणं आहे. मला काही लेखकांचे कॅाल्स येतात. मला एखादी हुकलाईन आवडली तर सांगतो की हे हिट आहे गाणं... यातून मला सुचलं की, आपण सर्व लेखणीची लेकरं असल्यानं बहिणाबाई म्हणाल्या की, माझी माय सरस्वती... त्यामुळे आपली माय एकच असल्याने सहोदर भेटल्याची भावना आता या क्षणी माझ्या मनात आहे. 'भेटी लागी आले शब्दांचे सोयरे, कौतुकाची दारे उघडली... गुरू म्हणे मानू कुणाचे आभार, सारे सहोदर भोवताली...' अशा शब्दांतून आपल्या भावना व्यक्त केल्या. 'कस्तुरीगंध' या स्तंभलेखकाचे लेखक प्रा.विजय तापस आपल्या भावना व्यक्त करताना म्हणाले की, 'कस्तुरीगंध' या सदरामुळे पुन्हा वृत्तपत्राच्या ताकदीचं कन्फर्मेशन मिळालं. जुन्या नाटकांवरचं हे सदर होतं. दर रविवारी सकाळी साडे दहा-अकरा वाजेपर्यंत महाराष्ट्राच्या अत्यंत ग्रामीण भागातूनही प्रचंड प्रमाणात ईमेल्स यायचे. इतकं लोकं वाचतात याचं आश्चर्य वाटतं. वृत्तपत्राची ताकद पुन्हा एकदा कळली. शाहिर अमर शेख यांच्या पहिला बळी या नाटकावर लिहिल्यावर गडचिरोलीतून एका नाटक मंडळाच्या सेक्रेटरीचा कॅाल आला. त्याने मला या नाटकाचं पुस्तक कुठे मिळेल असं विचारलं. तुम्ही लिहिलेलं वाचल्यावर आम्हाला हे नाटक ६५ वर्षांनी राज्य नाट्य स्पर्धेसाठी करायचं ठरवलं आहे. याद्वारे आम्हाला शाहीर अमर शेख यांना नाट्यकृतीद्वारे श्रद्धांजली वहायची असल्याचं ते म्हणाले ते आपल्याला अतिशय विलक्षण वाटल्याचंही ते म्हणाले. गतवर्षीचे पुरस्कार विजेते पुरुषोत्तम बेर्डे म्हणाले की, गवाणकरांना पुरस्कार देण्यासाठी रंगमंचावर आणताना मला खूप आनंद झाला. ते जिथून आले तिथूनच मी देखील आलो आहे. ते म्हणजे जेजे इन्स्टिट्यूट आॅफ आर्टस... गवाणकर आम्हाला खूप खूप सिनीयर आहेत. त्या काळात जेजेमध्ये नोकरी करून चित्रकला शिकता यावी असा कोर्स होता. अशाप्रकारे जी मंडळी शिकली त्यातील आदर्श गवाणकर आहेत. ते जीपीओमध्ये कामाला होते आणि जवळच असलेल्या जेजेमध्ये शिकले. १९६२ मध्ये त्यांनी डिप्लोमा घेतला आणि माझा १९७५ मधला म्हणजे मला किती सिनीयर होते ते समजेल. माझे गुरू दामू केंकरे हे त्यांचेही गुरू होते. त्यानंतर त्यांनी एकांकीका आणि नाटकांकडे झेप घेतली आणि 'वस्त्रहरण' हे माईलस्टोन नाटक मराठी रंगभूमीला दिल्याची भावना बेर्डे यांनी व्यक्त केली. सचिन दरेकर यांनी या सोहळ्याचे स्वागत व प्रास्ताविक केले.

राव आणि रंभाची ऐतिहासिक प्रेमकथा रुपेरी पडद्यावर

'रावरंभा' हा इतिहासाचा काहीसा दुर्लक्षित 'प्रेम अध्याय' १२ मे ला मराठी रुपेरी पडद्यावर उलगडला जाणार आहे.'ही प्रेमकथा आहे त्यागाची,समर्पणाची, प्रेमासाठी आणि स्वराज्यासाठी आपल्या जीवाची बाजी लावायला तयार असणाऱ्या पराक्रमी रावची आणि त्यासाठी झुरणाऱ्या रंभाची'. निर्माते शशिकांत शीला भाऊसाहेब पवार निर्मित आणि अनुप जगदाळे दिग्दर्शित हा रसिकांसाठी वेगळा रोमहर्षक अनुभव असणार आहे. ओम भूतकर आणि मोनालिसा बागल या चित्रपटातून जोडीच्या रूपाने समोर येणार आहेत. चित्रपटात छत्रपतींच्या भूमिकेत शंतनू मोघे तर प्रतापराव गुजर यांच्या भूमिकेत अशोक समर्थ असून यांच्यासोबत संतोष जुवेकर, कुशल बद्रिके, अपूर्वा नेमळेकर, मीर सरवर, किरण माने, रोहित चव्हाण, पंकज चव्हाण, अश्विनी बागल, मयुरेश पेम, अश्विनी बागल, विनायक चौघुले, शिवम देशमुख, कुणाला मसाले, आदर्श जाधव, रुक्मिणी सुतार, शशिकांत पवार आदि कलाकारांच्याही भूमिका आहेत. 'सात सात', 'हां मर्दा' अशी स्फुरण चढणारी गीते आणि 'तुझ्या दावणीला', 'एक रंभा एक राव' या प्रेमगीताचा नजराणा चित्रपटातील गीत-संगीतातून अनुभवायला मिळणार आहे. गुरु ठाकूर आणि क्षीतिज पटवर्धन यांच्या गीतांना आदर्श शिंदे, आनंदी जोशी, हर्षवर्धन वावरे, रवींद्र खोमणे या गायकांचा स्वरसाज लाभला आहे. संगीतकार अमितराज यांनी ही सर्व गीते संगीतबद्ध केली आहेत. व्हिडिओ पॅलेसकडे चित्रपटाच्या संगीताचे हक्क आहेत. या चित्रपटाची पटकथा, संवाद प्रताप गंगावणे यांचे आहेत. देवी सातेरी प्रॉडक्शन्सचे प्रभाकर परब या चित्रपटाचे प्रस्तुतकर्ते आहेत. सहनिर्माते डॉ. अजित भोसले आणि संजय जगदाळे आहेत. छायांकन संजय जाधव तर संकलन फैजल महाडिक यांचे आहे. कार्यकारी निर्माते महेश भारांबे, अन्वय नायकोडी आहेत. पार्श्वसंगीत आदित्य बेडेकर यांचे आहे. वेशभूषा पौर्णिमा ओक, रंगभूषा प्रताप बोऱ्हाडे, कलादिग्दर्शन वासू पाटील यांचे आहे. साहसदृश्ये शेवोलिन मलेश यांची आहेत. व्हीएफएक्सची जबाबदारी वॉट स्टुडिओ आणि जयेश मलकापूरे यांनी सांभाळली आहे. ध्वनीसंकलन दिनेश उच्चील, शंतनू अकेरकर यांचे आहे. प्रशांत नलवडे निर्मिती व्यवस्थापक आहेत.

” महावीर छत्रपती संभाजी” चित्रपटाचे स्क्रिप्ट पूजन

अक्षय्य तृतीयेच्या सुमंगल दिनी, तसेच छत्रपती शिवाजी महाराजांच्या परंपरेनुसार साजऱ्या होणाऱ्या जयंतीच्या पवित्र शुभमुहूर्तावर उर्विता प्रॉडक्शन्स आणि टीम कडून "महावीर छत्रपती संभाजी" या चित्रपटाच्या पहिल्या भागाच्या स्क्रिप्टचे पूजन करण्यात आले.. स्वराज्याचे द्वितीय छत्रपती शिवपुत्र संभाजी महाराजांच्या धगधगत्या जीवनाचा वेध घेणाऱ्या या मराठीतील बिग बजेट ऐतिहासिक चित्रपटाचा हा पहिला भाग मराठी चित्रपट सृष्टीचा मानबिंदू ठरेल अशी भावना चित्रपटाचे प्रस्तुतकर्ता संदिपदादा रघुनाथराव मोहिते पाटील यांनी यावेळी मत व्यक्त केली याप्रसंगी चित्रपटाचे दिग्दर्शक तुषार विजयराव.शेलार यांच्यासह सर्व तंत्रज्ञ व असंख्य शिवशंभू प्रेमी उपस्थित होते. या चित्रपटाचे निर्माते शेखर रघुनाथराव मोहितेपाटील हे आहेत.

‘खिल्लार’मधून होणार बैलगाडा शर्यतीचा जल्लोष

महाराष्ट्राच्या सामाजिक राजकीय वातावरणात बैलगाडा शर्यतींचे महत्व मोठे आहे. आता याच बैलगाडा शर्यतींचा जल्लोष चित्रपटात उडताना पाहायला मिळणार आहे. राष्ट्रीय पुरस्कारप्राप्त दिग्दर्शक मकरंद माने यांच्या "खिल्लार" या चित्रपटात बैलगाडा शर्यत आणि त्याभोवतीचे वातावरण दाखवले जाणार असून, रिंकू राजगुरु आणि ललित प्रभाकर या चित्रपटात प्रमुख भूमिकेत दिसणार आहेत. न्युक्लिअर अॅरो पिक्चर्स या निर्मिती संस्थेतर्फे या चित्रपटाची निर्मिती करण्यात येत आहे. मकरंद मानेनं दिग्दर्शित केलेला "रिंगण" हा चित्रपट राष्ट्रीय पुरस्काराचा मानकरी ठरला होता. त्यानंतर मकरंदनं यंग्राड, कागर, सोयरीक, पोरगं मजेतंय असे उत्तमोत्तम चित्रपट दिग्दर्शित केले आहेत. मूळचा पश्चिम महाराष्ट्रातला असल्यानं मकरंदनं बैलगाडा शर्यतींचं वातावरण अतिशय जवळून पाहिलं आहे. त्यामुळेच आता हा विषय तो 'खिल्लार' चित्रपटातून मांडत आहे. रिंकू राजगुरूनं कागर या चित्रपटात प्रमुख भूमिका केली होती. त्यामुळे मकरंद आणि रिंकू पुन्हा एकदा एकत्र काम करणार आहेत. तर मकरंद आणि रिंकू यांच्याबरोबर ललित प्रभाकर पहिल्यांदाच काम करत आहे.