अतिथी कट्टा

——–

आनंद दिघेसाहेबांच्या वेशभूषेत मला पाहिल्यानंतर त्यांच्या बहीण अरुणाताईंच्या डोळ्यात पाणी आलं. ते पाहून मला ऑस्कर मिळालंय, राष्ट्रीय पुरस्कारासह सगळे मोठे पुरस्कार मिळाल्यासारखं वाटतंय. तसेच नगरविकास मंत्री एकनाथजी शिंदेदेखील दिघेसाहेबांच्या व्यक्तिरेखेतील मला पाहून भावूक झाले होते. दिघेसाहेबांच्या सर्वात जवळची ही दोन माणसं जर या पद्धतीनं व्यक्त होत असतील तर एका कलाकाराला अजून दुसरी मोठी पावती अजून काय हवी असते… मी आतापर्यंत 90 चित्रपटांमध्ये अभिनय केला आहे. परंतु, चित्रपटाची शीर्षक भूमिका माझ्या वाट्याला काही आली नव्हती. जिवंतपणी दिघेसाहेब ही व्यक्ती आपल्या संपर्कात आलेल्या प्रत्येकावरील अन्याय दूर करण्याचा प्रयत्न करीत होती. मलाही कुठंतरी वाटत होतं की एक अभिनेता म्हणून माझ्यावर अन्याय होतोय. मी खूप मनापासून प्रयत्न करीत होतो. मी वेगवेगळ्या पद्धतीच्या भूमिका साकारीत होतो. त्यांचं प्रेक्षकांकडून कौतुकही झालं. पण मोठं काम हाताला काही लागत नव्हतं. हा माझ्यावर अन्याय होतोय असं मला वाटत होतं.