अतिथी कट्टा

2020च्या मकर संक्रांतीला आम्ही ‘चंद्रमुखी’चा चेहरा लपलेला पोस्टर रिलीज केला. परंतु, त्यानंतर कोरोनाची साथ सुरू झाली. त्यानंतर पहिलं लॉकडाऊन जेव्हा उघडलं तेव्हा आम्ही चित्रपट शूट केला. या चित्रपटामधील शीर्षक व्यक्तिरेखेसाठी मी खूप वेगळी तयारी केली. या चित्रपटामधील माझ्या व्यक्तिरेखेची भाषा मी कधी अनुभवली नव्हती, तसेच ऐकलीही नव्हती. ही मावळ भागामधील भाषा असून थोडासा गावरान टच तिला आहे. ज्यात ‘पण’ नाही तर ‘पर’ असं म्हणतो. तसेच ‘म्हणतो’ हा शब्द ‘म्हंतो’ असा बोलला गेलाय. माझी भूमिका चांगली वठण्यासाठी प्रसादनं खूप मेहनत घेतलीय. कसं लाजायचं, डोळे कसे पाणावलेले आहेत ते दाखवायचे, चित्रपटाच्या प्रमोशनमध्ये मी कसं बोलायचं आहे या सगळ्या गोष्टी त्यानं मला समजावून सांगितल्या. त्याचं बोट धरून मी ‘चंद्रमुखी’ची वाटचाल केलीय. चित्रपटाच्या शूटिंगपूर्वीच आम्ही खूप तयारी केली असल्यामुळे नंतरचं आमचं काम थोडं सोप्पं झालं. छायालेखक संजय मेमाणे सरांबरोबर प्रसादला बराच वेळ हवा होता. तो त्यानं घेतला. प्रसाद एक उत्तम नट आहे. त्यामुळे त्याच्यासोबतच्या आठवणी मला आयुष्यभर कामी येतील.

मृण्मयी देशपांडेबरोबर यापूर्वी मी ‘कट्यार काळजात घुसली’ या चित्रपटात काम केलं होतं. त्यामुळे आमचं ट्युनिंग फारच उत्तम होतं. मुन्ना आणि मी तेवढीच मस्तीही करायचो. एक अभिनेत्री म्हणून ती खूपच उजवी आहे. आदिनाथ कोठारेबरोबरचं माझं ट्युनिंग हळूहळू वाढत गेलं. आदिनाथ आणि माझ्यातील एक कॉमन गोष्ट म्हणजे आम्ही कलावेडी लोक आहोत. आम्ही दोघांनीही आपापल्या व्यक्तिरेखेत अगदी ओतून काम केलंय. या भूमिकेसाठी माझ्याकडे जे काही होतं, ते सर्व काही मी ओतलं आहे. ‘ंचंद्रमुखी’ बेभान होऊन नाचत असली तरी ती तिच्या कलेसाठी नाचत असते. ते दिसणं खूप जास्त गरजेचं होतं. नृत्यदिग्दर्शक दिपाली विचारे आणि आशीष पाटील यांच्याबरोबर मी वर्कशॉप्स करीत होतं. परंतु, माझी नृत्याची कार्यशाळा प्रसाद ओकनंही घेतली. जयश्री गडकर, मधु कांबीकर, रंजना यांच्या गाण्यांवर त्यानं माझ्याकडून नृत्य बसवून घेतलं होतं. तसेच ऑफबीट त्यानं मला नाचायला लावलं. चंद्रामधील ग्रेस, नाजूकपणा त्याला तिच्या नृत्यात हवा होता. यात खडी लावणी आहे, बैठकीची लावणीही आहे. मराठी चित्रपटामध्ये अनेक वर्षांनी प्रेक्षकांना बैठकीची लावणी ‘चंद्रमुखी’मुळे पाहायला मिळणार आहे. त्यामुळे माझं नॉर्मल नृत्य आणि या चित्रपटामधील नृत्य खूपच वेगळं आहे. माझ्या करिअरमधला हा सर्वाधिक चॅलेंजिंग रोल आहे. करोनाच्या साथीमुळे आम्हाला भरपूर वेळ मिळाला या चित्रपटाच्या तयारीसाठी. वजन वाढविण्यापासून ते नाक टोचण्यापर्यंतच्या सर्व गोष्टी मी या चित्रपटासाठी केल्या. या चित्रपटाचा निर्माता अक्षय बर्दापूरकरनी आपलं सगळं पॅशन या चित्रपटात आणलंय. ते आम्हाला सतत ऊर्जा देत आलेत. हे अजिबात सोपं काम नाहीय. मराठी फिल्म म्हटलं की पैशाचा प्रश्न खूप मोठा असतो. पण त्यानं खूप स्ट्रगल करून ही फिल्म बनवलीय. म्हणूनच मी आयुष्यभर अक्षयची ऋणी राहीन.

– अमृता खानविलकर