अतिथी कट्टा

——

‘आप्पा आणि बाप्पा’ या चित्रपटामध्ये काम करण्याचा अनुभव खूपच छान होता. एक तर अश्विनी चौधरीसरांच्या कामाचा मी फॅन आहे. ‘ऑफिस ऑफिस’सारख्या मालिका ज्या माणसानं लिहिल्याहेत त्यांचं आतापर्यंतचं सगळंच काम उत्कृष्ट आहे. त्यांची गोष्ट सांगण्याची पद्धत अफलातून आहे. आपल्याला ज्या गोष्टी दिसत नाहीत, त्यात त्यांना विनोद दिसतो. अश्विनसरांच्या स्वभावामध्ये जो एकंदरीत तिरकसपणा आहे, तो संपूर्णपणे या चित्रपटामध्ये उतरला आहे. ‘आणि डॉ. काशीनाथ घाणेकर’ या चित्रपटाच्या सेटवर हा चित्रपट मी स्वीकारला होता. या चित्रपटाचं शूटिंग सांगलीला सुरू असताना अश्विनीसर मला भेटायला आले होते. तिथं मी गोष्ट ऐकली. त्यांच्याकडून मला सहकलावंतांची नावं कळली नि मी लगेचच हा चित्रपट स्वीकारला.

भरत जाधवबरोबर मी तब्बल नऊ-दहा वर्षांनंतर काम करतोय. यापूर्वी आम्ही ‘उलाढाल’ नावाचा चित्रपट केला होता. त्या चित्रपटामध्ये मी व्हिलनची व्यक्तिरेखा साकारली होती आणि भरत हीरो झाला होता. भरतचा मी वैयक्तिक खूप मोठा फॅन आहे. त्याची एनर्जी, त्याचा टायमिंग सेन्स, त्याची नाटकं, त्याचं सिनेमे आहे. त्यामुळे त्याच्याबरोबर काम करणं हा नेहमीच आनंददायी अनुभव राहिला आहे. ज्याला आपण पडद्यावरती कायम बघतो, नाटकात कायम बघतो, त्याच्याबरोबर जेव्हा आपण स्क्रीन शेअर करतो, हीदेखील खूप आनंददायी बाब असते. दिलीपभैय्यांबरोबरही (दिलीप प्रभावळकर) माझा हा दुसरा चित्रपट आहे. यापूर्वी मी त्यांच्याबरोबर बऱ्याच वर्षांपूर्वी ‘कवडसे’ नावाचा चित्रपट केला होता.