अतिथी कट्टा

——

जगभरात कोरोनाच्या साथीनं थैमान घातलेलं असताना आपल्या मराठी मनोरंजन उद्योगालाही मोठा फटका बसला आहे. चित्रपट, मालिका यांचं शूटिंग गेल्या दीड महिन्यांपासून थांबले आहे. तसेच तमाशा, नाटके तसेच विविध लोककलांनाही त्याचा मोठा फटका बसला आहे. आपल्या क्षेत्रामधील अनेकांचं पोट हे दररोज चालणाऱ्या शूटिंगवर भरत असतं. शूटिंगच ठप्प झाल्यामुळे बहुतेकांचा रोजगार बुडाला आहे. मी बऱ्याच कलाविषयक संस्थांचा अध्यक्ष आहे. गेल्या महिन्याभरापासून माझं अनेकांशी सविस्तर बोलणं झालं आहे. त्यामधून आपल्या चित्रपट उद्योगासमोर जे गंभीर संकट उभं राहिलं आहे, याची कल्पना येते.

अखिल भारतीय मराठी चित्रपट महामंडळाचा अध्यक्ष या नात्याने तसेच आमचे सर्व संचालक मंडळाचे सदस्य गेले महिनाभर ज्यांना फटका बसला आहे, अशांच्या मदतीसाठी प्रयत्न करीत आहोत. काहींना आम्ही आर्थिक मदत केली आहे, काहींना जीवनावश्यक धान्य, वस्तूंचीही मदत करण्यात आली आहे. ही मदत अपुरी आहे, याची आम्हांला कल्पना आहे. परंतु, आमच्याकडून जी काही मदत तातडीनं करणं शक्य आहे, ती आम्ही करीत आहोत. महामंडळाकडे येणारा निधी हा फक्त सदस्यांच्या निधी शुल्कामधून येतो. आमच्या संचालक मंडळानं सूत्र स्वीकारून आता चार वर्षं झाली आहेत. गेल्या चार वर्षांमध्ये आम्ही काटकसरीनं कारभार करीत कोल्हापूर, पुणे आणि मुंबई येथे महामंडळाची स्वमालकीची कार्यालयं उभी केली. आमच्या सर्व कार्यालयांमधून सध्या मदत केली जात आहे.