अतिथी कट्टा

दिनांक : १६-१२-२०१९

‌‌‌‌‌‌‌‌‌सिनिअर नव्हे तर सिरिअस सिटीझन बना – अजय फणसेकर



ज्येष्ठांच्या समस्येवर आधारलेला सिनिअर सिटीझन चित्रपट नुकताच प्रदर्शित झाला आहे. त्यानिमित्ताने या चित्रपटाचे लेखक-दिग्दर्शक अजय फणसेकर यांचं हे मनोगत.

——

‘सिनिअऱ सिटीझन’ ही एका निवृत्त मेजर जनरलची कथा आहे. या व्यक्तिरेखेचं नाव आहे अभय देशपांडे. ती मोहन जोशी यांनी चित्रपटात साकारली आहे. हा मेजर अत्यंत धाडसी असून त्यानं देशासाठी विलक्षण शौर्य गाजवलेलं आहे. त्याबद्दल त्यांना वीरचक्र हा पुरस्कारही मिळालेला आहे. सर्वसामान्य लोक त्याला ‘टायगर’ या नावानं हाक मारीत असतात. वैयक्तिक आयुष्यात त्याला बरेच बालमित्र आहेत. तेही आता ७५ वर्षांचे झाले आहेत. मात्र हा टायगर स्वतः ७५ वर्षांचा असला तरी तो स्वतःला सिनिअर सिटीझन समजत नसतो. तो फिट आहे. तो रोज व्यायाम करीत असतो. रोज बॉक्सिंगही करीत असतो. मनानं नि विचारानं अगदी फिट असतो. तो सतत सगळ्यांना सांगत असतो की तुम्ही सिनिअर सिटीझन न बनता सिरिअस सिटीझन बना. सरकारच्या काही सेवा मिळवण्यासाठी तुम्ही स्वतःला म्हातारपण आणता. तसा प्रकार करू नका. सिरिअस सिटीझन बनण्यासाठी तुम्ही सतत अलर्ट राहिलं पाहिजे. फिट राहिलं पाहिजे. तसेच स्वतःवर तसेच इतरांवर आलेल्या संकटांवर तुम्हाला मात करता आली पाहिजे. अडचणीत असलेल्याला मदत करता आली पाहिजे असं या मेजर जनरलचं मत असतं. त्याची पत्नी लक्ष्मी देशपांडे. ही व्यक्तिरेखा स्मिता जयकर यांनी साकारलेली आहे. हे दोघे वांद्रे येथे आपल्या वडिलोपार्जित घरात राहत असतात. निवृत्तीनंतर देशपांडे हे एका सुरक्षाविषयक कंपनीत सुरक्षा सल्लागार म्हणून काम करीत असतात. लक्ष्मीबाई या स्वतःच्या नृत्याचे क्लासेस घेत असतात. या देशपांडेंचं सगळं कुटुंबच लष्करातील असतं. त्यांचे वडील, मुलगा यांना युद्धात हौतात्म्य आलेलं असतं. त्यांच्या घरात सौम्या नावाची एक मुलगी येते. तिच्याशी या दोघांचं एक भावनिक नातं बनतं. परंतु, ही मुलगी पुढे अंमली पदार्थांच्या व्यसनात सापडते. त्यानंतर पुढं काय घडतं ते या चित्रपटात दाखवलं.

‘इन्काउंटर’ चित्रपट केल्यानंतर मी या चित्रपटाची हिंदीत कथा लिहिली होती. तेव्हा माझ्या मनात या व्यक्तिरेखेसाठी नसिरुद्दीन शाह होते. परंतु, तो चित्रपट काही बनला नाही. परंतु, ही कथा मराठीत करण्याची जेव्हा वेळ आली तेव्हा माझ्यासमोर फक्त मोहन जोशी यांचंच नाव होतं. माझा मित्र राजू सावला हा या चित्रपटाचा क्रिएटिव्ह निर्माता आहे. मिलिट्रीमनच्या बायकोच्या व्यक्तिरेखेत मला फक्त स्मिता जयकरच दिसत होत्या. म्हणून मी या दोन्ही महत्त्वाच्या व्यक्तिरेखेसाठी त्यांची निवड केली. अनेक नवीन कलाकारांना मी या चित्रपटात संधी दिलीय. विजय पाटकर, कमलेश सावंत, आशीष पवार, शीतल क्षीरसागर हे कलावंतही या चित्रपटात पाहायला मिळतील. जसा ठरवलाय तसा चित्रपट बनविण्यात आम्ही यशस्वी झालोय. पावसामुळे आम्हाला खूप अडचणी आल्या. परंतु, या सगळ्या अडचणींवर आम्ही मात केली. माझी टेक्निकल टीम खूप चांगली होती. सगळ्यांनी खूप झोकून काम केलंय.

– अजय फणसेकर

ठेवणीतले लेख

आपल्या प्रतिक्रिया येथे नोंदवा



[recaptcha]

काही निवडक प्रतिक्रिया:

वसंत पी.

मी तान्हाजी चित्रपट पाहिला तो सुद्धा मराठीत. संवाद हिंदी मधले जास्त प्रभावी वाटत होते. का कोण जाणे (हे फक्त ट्रेलर बघून). मराठीतले संवाद आणखीन प्रभावी होतील असे काही तरी करायला हवे.
संदर्भ:- ई-मेल प्रतिक्रिया