अतिथी कट्टा

——

संतोष तोडणकर या चित्रपटाच्या निर्मिती प्रक्रियेबद्दल सांगतात, “बालपणापासून आपल्या प्रत्येकाच्या घरातील प्रत्येकावर श्री समर्थ रामदासांच्या मनाच्या श्लोकांचे संस्कार झालेले आहेत. पुढे मोठे झाल्यानंतर आपल्यावर समर्थांच्या दासबोधारुपी सामाजिक संस्कारही झाले. समर्थांचा विचार, समर्थांचा संदेश या चित्रपटामधून मांडण्याचा प्रयत्न मी आणि माझ्या टीमनं केला आहे. त्याला अलकाताई, शंतनूजी, सौरभजी या मान्यवरांनी मोलाची साथ दिली आहे. आमच्या चित्रपटामध्ये चमत्कारांना थारा नाही. चमत्कारांपेक्षा आणि समर्थ रामदासांच्या विचारप्रणालीला अधिक महत्त्व दिलं आहे. दासबोध, मनाचे श्लोक, करुणाष्टके यासारख्या साहित्यकृतींमधील महत्त्वाचा भाग चित्ररुपात प्रेक्षकांना पाहायला मिळणार आहे. समर्थांचा विचार ठसठशीत होण्यासाठी आजच्या काळातील गोष्टीची सांगड़ घालण्यात आली आहे. काही तरुणांना एका ठिकाणी जाताना अपघात होतो. ते अशा ठिकाणी सापडतात की त्यांना तिथून समर्थांचे जीवनसार कळते. समाजात कसं वावरायला हवं, खोटं बोलू नये यासारख्या गोष्टींचा त्यांना इथून बोध होतो. इथून त्यांच्या जीवनाची नवीन सुरुवात होते.

“वर्षानुवर्षे प्रेक्षकांच्या स्मरणात राहणारी सिनेमाची सुमधुर गाणी सिनेमाला आजीवन संजीवनी देत असतात. संगीत रसिकांच्या तोंडी गुणगुणली जाणारी श्रवणीय गाणी वेगळ्याच विश्वात घेऊन जातात यात शंका नाही. असाच उत्तम संगीताचा आणि कौटुंबिक मनोरंजनाचा मेळ असलेला हा चित्रपट आहे. विप्र एंटरटेनमेंटच्या अश्विनी माहेश्वरी आणि दिशादिपा फिल्म्सच्या सौ. दिपा प्रकाश सुरवसे यांची निर्मिती असलेला हा सिनेमा भारती झुंबरलाल राठी आणि संजय राठी यांनी प्रस्तुत केला आहे. या सिनेमाची मूळ संकल्पना विधीतज्ञ सौ विजया प्रवीण माहेश्वरी यांची आहे. घराघरातील संस्कारांचा पाया असलेले “मनाचे श्लोक” याचे उदगाते राष्ट्रसंत रामदास स्वामी यांनी दिलेला अमूल्य ठेवा घराघरात गेल्या कित्येक पिढ्यांपासून जपला जात आहे. त्यांनी लिहिलेला ‘दासबोध’ ग्रंथ आजच्या दैनंदिन कठीण प्रसंगात मार्गदर्शक ठरतो. त्यांनी बलोपासना, नामस्मरणाचे महत्व समजावून दिले. त्यांनी घालून दिलेला आदर्श आणि मार्गदर्शन ”श्री राम समर्थ” सिनेमात उलगडणार आहे. लग्नातील ”सावधान” या शब्दामागील नेमका अर्थ समजावून घेणारा अवघ्या १२ वर्षाचा छोटा नारायण ते अफाट ज्ञान आणि रामरायाच्या भक्तीत आकंठ बुडून प्राप्त केलेली सिद्धी संत रामदास स्वामींच्या ठायी पाहायला मिळते. स्त्रियांचा आदर आणि महिला सबलीकरणाचे समर्थ खरेखुरे पुरस्कर्ते होते हे देखील सिनेमात पाहण्यास मिळते.