अतिथी कट्टा

——–

राष्ट्रीय चित्रपट पुरस्काराची जबाबदारी किती असते, हे अजून मला नक्की माहीत नाही. त्यामुळे आपण अजून कशा पद्धतीनं प्रतिक्रिया द्यावी, कसं वागायचं हे अजूनही मला समजलेलं नाही. परंतु आपण केलेल्या मेहनतीचं फळ एवढ्या सुंदर रीतीनं मिळाल्याबद्दल खूप छान वाटतंय. कौतुकाची थाप तुमच्या पाठीवर पडते, याबद्दल खूप छान वाटतंय. या चित्रपटासाठी सगळ्यांनी खूप मेहनत केली आहे. जीव ओतून काम केलं आहे.

या चित्रपटाची गोष्ट खूप साधी नि सरळ आहे. त्यामुळे मला खूप काही वेगळं करण्याची गरजच पडली नाही. माझ्या व्यक्तिरेखेचं नाव ‘इंद्रायणी’ असून हे नावच जितकं निर्मळ आहे, तितकीच ती व्यक्तिरेखाही आहे. अर्थात पडद्यावर साधं काम करणं हेच खूप मोठं आव्हान असतं. कधीकधी एखाद्या भूमिकेसाठी आपण खूप काम करायला गेलो की गोंधळ होतो. आमचे दिग्दर्शक शंतनू रोडेसरांनी माझ्यासाठी खूप गोष्टी सोप्या करून ठेवल्या होत्या.

या चित्रपटात खूप मोठे कलाकार असून ते सगळे माझ्याशी तितक्याच प्रेमानं जोडले गेले आहेत. मृणालताई, गिरीजाताई, मधुराताई, शशांक केतकर, मिलिंद गुणाजी, मोहनकाका, सुव्रत, सविताताई, चित्रपटामधील माझ्या छोट्या मुलाची भूमिका साकारणारा आरव यात आहे. सुव्रतनं या चित्रपटात ‘सुजीत’ची भूमिका साकारली आहे आणि आरव, ‘सुजीत’शिवाय ‘इंद्रायणी’ पूर्णच नाही होऊ शकत. हे कलाकार, तसेच गीतकार, संगीतकार, गायक या सगळ्यांच्या मेहनतीचं फळ म्हणजे आम्हाला मिळालेला राष्ट्रीय पुरस्कार आहे. या सगळ्यांचे मी आभार मानते.

गमतीशीर गोष्ट म्हणजे आजपर्यंत मी कोणतीही पैठणी विकत घेतलेली नाही. सगळ्या मला ‘गिफ्ट’ म्हणून मिळालेल्या आहेत. ‘तारांगण’च्या मुखपृष्ठासाठी नेसलेली पैठणी ही माझ्या आजीची (वडिलांची मामी) आहे. ती किती वर्षं जुनी आहे, हे मलादेखील ठाऊक नाही. परंतु चांगल्या पैठणीत आवश्यक असलेल्या सगळ्या गोष्टी तिच्यात आहेत. प्रत्येक पैठणी मला कोणीतरी ‘गिफ्ट’ केलीय. त्यामुळे प्रत्येक पैठणीची माझ्यासाठी वेगळी आठवण आहे. एक मला ‘होम मिनिस्टर’मध्ये मिळालीय, एक मला शुभांगी गोखले यांनी दिलीय. माझे फॅन्स मला पैठणी गिफ्ट देतात. त्यामुळे यापुढेही मी पैठणी विकत नाही घेणार.

‘गोष्ट एका पैठणीची’ या चित्रपटाची टॅगलाइन आहे, स्वप्नपूर्तीचा प्रवास. तीच टॅगलाइन माझ्या वैयक्तिक आयुष्यातील प्रवासाशी मिळतीजुळती आहे. खरं तर स्वप्नं सगळेच पाहतात. पण काहींचीच ती पूर्ण होतात. त्यातली मी एक आहे. चांगल्या सिनेमामध्ये काम करण्याचं माझं स्वप्न पूर्ण झालं. राष्ट्रीय असंच नव्हे तर कोणताही पुरस्कार मिळवण्याचं माझं स्वप्न नव्हतं. पण तेही या चित्रपटाच्या निमित्तानं पूर्ण झालं.