चित्र-चरित्र

हिंदी चित्रपटसृष्टीतील अलीकडच्या काळातील सर्वाधिक लोकप्रिय मराठी चेहरा म्हणजे माधुरी दीक्षित. १९८४च्या ‘अबोध’पासून आपल्या कारकिर्दीची सुरुवात करणाऱ्या माधुरीनं त्यानंतरच्या दोन दशकांमध्ये अनेक उत्तमोत्तम चित्रपटांमध्ये काम केलं. एन. चंद्रा दिग्दर्शित ‘तेजाब’ चित्रपटामधील ‘एक दो तीन’ गाण्यामुळे तिला मोठी प्रसिद्धी मिळाली. त्यानंतर तिनं ‘राम लखन’, ‘परिंदा’, ‘दिल’, ‘साजन’, ‘बेटा’, ‘हम आपके है कौन’, ‘दिल तो पागल है’, ‘मृत्यूदंड’, ‘देवदास’ असे उल्लेखनीय चित्रपट केले. यश चोप्रा, संजय लीला भन्साळी, विधू विनोद चोप्रा, सूरज बडजात्या, प्रकाश झा यांच्यासारख्या दिग्गज दिग्दर्शकांबरोबर तिनं काम केलं आहे. डॉ. श्रीराम नेने यांच्याशी विवाहबद्ध झाल्यानंतर ती काही काळ अमेरिकेत वास्तव्यास होती. भारतात परतल्यानंतर तिनं ‘आजा नच ले’ हा चित्रपट केला. ‘बकेट लिस्ट’ हा माधुरीचा पहिला मराठी चित्रपट २०१८ मध्ये प्रदर्शित झाला होता. त्यानंतर ती ‘टोटल धमाल’ आणि ‘कलंक’ या दोन हिंदी चित्रपटांमधून झळकली.

२०२२ मध्ये माधुरी दीक्षित यांची मुख्य भूमिका असलेला 'मजा मा' हा चित्रपट ओटीटीवर प्रदर्शित झाला होता.

- मंदार जोशी