अतिथी कट्टा

खरं तर या चित्रपटात चार व्यक्तिरेखा पाहायला मिळणार असल्या तरी त्यातली चौथी व्यक्तिरेखा ही अदृश्य आहे. ती आहे खुद्द प्रेक्षकच. पडद्यावर दिसणाऱ्या तीन व्यक्तिरेखांचा मनाचा खेळ या चित्रपटामधून प्रेक्षकांना पाहायला मिळेल आणि ते स्वतः त्यामध्ये गुंतत जातील.

हा चित्रपट प्रदर्शित करण्यापूर्वी मी तो काही समीक्षकांना दाखवला. त्यांना तो खूप आवडला. या चित्रपटाच्या ट्रीटमेंटला त्यांनी उत्तम दाद दिली आहे. या चित्रपटाचं कास्टिंग खूप वेगळं आहे. मिलिंद गुणाजी आणि पल्लवी सुभाष हे लोकप्रिय आणि कसलेले कलाकार या चित्रपटात आहेत, तर या चित्रपटाद्वारे साईंकित कामत प्रथमच चित्रपटसृष्टीत पाऊल ठेवत आहे. ‘रात्रीस खेळ चाले’ या मालिकेमधील त्याची कामगिरी खूप उत्तम होती. ती पाहूनच मी त्याला या चित्रपटासाठी कास्ट केलं. त्याचा हा पहिलाच चित्रपट असून त्यानं खूप उत्तम काम केलं आहे. मराठी चित्रपटसृष्टीत एक नवीन स्टार जन्माला आलाय एवढंच मी म्हणेन. साईंकित या चित्रपटात एका पेंटरच्या मुलाची गोष्ट साकारली आहे. मिलिंद गुणाजीनं समर बांदोडकर हा एका आर्टिस्टच्या भूमिकेत आहे. पल्लवी सुभाषच्या वाट्याला मोहिनी ही व्यक्तिरेखा आहे. या व्यक्तिरेखेचे आडनाव मी मुद्दाम सांगत नाही. कारण त्यामध्येही आम्ही काही रहस्याचा धागा ठेवला आहे. आयरिस प्रॉडक्शन हाऊसने या चित्रपटाची निर्मिती केली आहे.

‘वेलकम टू माय हाउस’ हा मिलिंदच्या तोंडचा ट्रेलरमधील संवाद आणि त्याचा भारदस्त आवाज प्रेक्षकांच्या चांगलाच पसंतीस उतरला आहे. आतापर्यंत खूप हलक्या फुलक्या भूमिकेत पाहायला मिळालेला साईंकित या चित्रपटात एकदम वेगळ्याच व्यक्तिरेखेत पाहायला मिळणार आहे. त्याच्या अगदी विरुद्ध भूमिका साईंकित या चित्रपटात साकारत आहे. मराठी आणि कोकणी भाषेत आम्ही हा चित्रपट निर्मिला आहे. प्रेक्षकांना तो आवडेल अशी अपेक्षा आहे.

– राजेंद्र तालक