नव्या जोडीचं पदार्पण…
चांगल्या कथेच्या कॅनव्हासवर चित्रपटातील गीतांनी सुरेख रंग भरले आहेत. मंगेश कागणे व क्षितीज पटवर्धन या लोकप्रिय गीतकारांच्या शब्दांनी यातील चारही गीते सजली असून चिनार-महेश या युवा संगीतकार जोडीचा संगीतसाज या गीतांना लाभला आहे. पंढरीच्या विठ्ठलाची महती सांगणारे, गायक राहुल देशपांडे यांच्या आवाजातील ‘ठाई ठाई माझी विठाई’ तसेच आदर्श शिंदे यांनी गायलेलं ‘देव कोंडला’ हे भक्तीगीत प्रेक्षकांना समाधानाची अनुभूती देईल.
मंगेश देसाई, अनुराधा राजाध्यक्ष, उदय सबनीस, विद्याधर जोशी, संजय खापरे, अंशुमन विचारे, केतन पवार, विजय निकम, प्रणव रावराणे, राजेश भोसले या कलाकारांसह विजय साईराज आणि कृतिका गायकवाड ही नायक-नायिकेची नवी जोडी या चित्रपटाद्वारे रुपेरी पडद्यावर पदार्पण करीत आहेत. या दोघांनी या चित्रपटात काम करण्याचा अनुभव अत्यंत सुखद असल्याचं सांगितलं. या चित्रपटामधील नायकासाठी बराच शोध सुरू होता. कोणतंच नाव पसंत पडत नव्हतं आणि अचानक दिग्दर्शकाला आपल्या चित्रपटाच्या निर्मितीसाठी झटणाऱ्या विजयचं नाव सुचलं. आपल्या भूमिकेबद्दल विजय म्हणतो, “माझा हा पहिलाच चित्रपट. तसा अभिनयाशी माझा काहीच संबंध नाही. मात्र दिग्दर्शकानं संधी आणि प्रोत्साहन दिल्यामुळेच मी हे सगळं करू शकलो. या चित्रपटामधील सर्व कलावंत मान्यवर आहेत. त्यांच्या अनुभवाचाही मला खूप फायदा घेतला. त्यांनी वेळोवेळी मला मार्गदर्शन केलं.” नेमकी हीच भावना अभिनेत्री कृतिकानंही व्यक्त केली. या चित्रपटात विजयबरोबर आपलं ट्यूनिंग विशेष जुळल्याचा उल्लेख केला. चित्रपटामध्ये आमच्या दोघांमधील विसंवाद पाहायला मिळतो. प्रत्यक्ष चित्रीकरणावेळीही आम्ही भरपूर भांडल्याचं तिनं सांगितलं. या चित्रपटामधील गाणी खूप छान जमली आहेत. यापूर्वी हिंदी तसेच मराठी चित्रपटांमधील असंख्य गाणी आपण चित्रपटगृहात पाहिली. मात्र प्रत्यक्ष आपल्यावरच एखादं गाणं चित्रीत होतंय, हे पाहताना त्यावर विश्वासच बसत नव्हता असंही कृतिका म्हणाली.
काही निवडक प्रतिक्रिया:
नरेंद्र चौधरी
आपल्या संकेतस्थाळाच्या माध्यमातून असे लक्षात आले कि आपन खूप छान माहिती पुरवत आहात.
संदर्भ:- ई-मेल प्रतिक्रिया