चित्र-चरित्र

भरत जाधव
भरत जाधव
अभिनेता
१२ डिसेंबर

भरत जाधव हे मराठी रंगभूमी आणि चित्रपट क्षेत्रातील एक अग्रगण्य नाव. भरतचा जन्म लालबाग– परळ परिसरात झाला. तिथेच त्याचं बालपण गेले. भरत जाधव यांनी शाहिर साबळे यांच्या मार्गदर्शनाखाली "लोकधारा" मधून आपली अभिनय यात्रा सुरू केली. भरत जाधव यांनी आपल्या आजवरच्या कारकिर्दीत जवळपास ८५ चित्रपट, आठ दूरचित्रवाणी मालिका केल्या. रंगभूमीवरील आपल्या कामामुळे ते अधिक लक्षात राहिले आहेत. गिरणी कामगारांच्या जीवनावर प्रकाश टाकणारे सीरियस ‘अधांतर’ नाटक असो किंवा ‘ऑल द बेस्ट’, ‘श्रीमंत दामोदरपंत’, ‘आमच्यासारखे आम्हीच’, ‘ढॅण्ट ढॅण’ आणि ‘सही रे सही’ ही कॉमेडी नाटके. भरत जाधव यांची भूमिका नेहमीच ‘फ्रेश’ वाटली. पूर्वीचे ‘सही रे सही’ आणि आताचे ‘पुन्हा सही रे सही’ नाटक त्याच्या नाट्य कारकिर्दीतील मैलाचा दगड ठरले. या नाटकाचे हजारो प्रयोग झालेत. तब्बल १५ वर्षे हे नाटक सलगपणे सुरू आहे. ‘सही रे सही’ या नाटकात भरत जाधवने गलगले, कुरियर घेण्यासाठी आलेला माणूस, श्रीमंत म्हातारा व वेडसर मुलगा अशा चार भूमिका केल्या आहेत. या नाटकाचे एका वर्षात ५६५ प्रयोग झाले होते. त्यासाठी त्याची नोंद गिनीज बुकमध्ये झाली होती. ‘सही रे सही’ या नाटकाचे ‘अमे लई गया, तमे रही गया’ या नावाने गुजराती भाषेत प्रयोग झाले. त्यात शर्मन जोशीने प्रमुख भूमिका केली होती. गुजराती ‘सही रे सही’ नाटकाचे २० महिन्यांत ३५० प्रयोग झाले होते. एखाद्या नाटकाचे इतके प्रयोग होणे, हे गुजराती रंगभूमीवर प्रथम घडले होते. ‘सही रे सही’ नाटकाचे ‘हम ले गये, तुम रह गये’ या नावाने हिंदीत भाषांतर झाले. हिंदी नाटकात जावेद जाफरीने प्रमुख भूमिका साकारली होती. भरत जाधव निर्मिती क्षेत्रात असून 'भरत जाधव एन्टरटेन्मेंट' या नावाने कार्यरत आहे. कंपनीचे संकतस्थळ bharatjadhaventertainment.com. मराठी चित्रपटसृष्टी बॉलीवूडइतकी श्रीमंत नसली तरी मराठीतला सुपस्टार भरत जाधवने सर्वप्रथम स्वत:ची व्हॅनिटी व्हॅन विकत घेऊन आद्य नटाचा मान मिळवला आहे. ‘सही रे सही’, ‘श्रीमंत दामोदरपंत’, ‘ऑल द बेस्ट’, ‘आमच्यासारखे आम्हीच’ ही त्याची महत्त्वाची नाटके, तर ‘श्रीमंत दामोदर पंत’, ‘खो खो’, ‘फेकमफाक’, ‘नो एंट्री पुढे धोका आहे’, ‘डावपेच’, ‘क्षणभर विश्रांती’, ‘रिंगा रिंगा’, ‘शिक्षणाच्या आयचा घो’, ‘जावई बापू जिंदाबाद’, ‘गलगले निघाले’, ‘साडे माडे तीन’, ‘मुंबईचा डबेवाला’, ‘मुक्काम पोस्ट लंडन’, ‘ह्यांचा काही नेम नाही’, ‘बकुळा नामदेव घोटाळे’, ‘नाना मामा’, ‘माझा नवरा तुझी बायको’, ‘नामदार मुख्यमंत्री गणप्या गावडे’, ‘चालू नवरा भोळी बायको’, ‘जत्रा’, ‘खबरदार’, ‘पछाडलेला’, ‘सरीवर सरी’, ‘हाऊसफुल्ल’, ‘नव-याची कमाल, बायकोची धमाल’, ‘खतरनाक’, ‘वास्तव’, ‘हसा चकटफू’ हे त्याचे महत्त्वाचे चित्रपट.

अलीकडच्या काळातील भरत जाधव यांचा एक वेगळा चित्रपट म्हणजे ‘आप्पा आणि बाप्पा’. दिग्दर्शक केदार शिंदे यांच्या ‘सुखी माणसाचा सदरा’ या मालिकेतही त्यांनी आपली चमक दाखवली. 'तमाशा लाईव्ह' या २०२१ मधील चित्रपटात भरत जाधव यांनी महत्वाची व्यक्तिरेखा साकारली होतो.

-मंदार जोशी



चित्र-चरित्र